VOV4.Bahnar - Kơ sơ̆ ‘năr 19/12/2021, tơ̆ Anih jang Kơ dră tơm teh đak Ấn Độ, Kơ dră Kuôk hô̆i Vương Đình Huệ hlôi pơ ma dơ nuh hăm Kơ dră tơm teh đak Ấn Độ Ram Nath Kovind (Ram Nát Cô-vin) lơ̆m jơ năr năm tơ mang tơ̆ teh đak Cộng hòa Ấn Độ. 2 kơ dră chĕp kơ̆l drơ̆ng nơ̆r akhan tơ drong pơ vei 2 teh đak roi ‘năr roi hơ tŏk tơ iung kơ jăp lơ̆m lơ tơ drong jang. 2 kơ dră chĕp kơ̆l drơ̆ng nơ̆r hơ nơ̆ng pơ vei rim ‘măng năm tơ mang păng pơ ma dơ nuh kơ dră kơ pal păng rim kơ dră  kơ teh đak, khŭl kơ dră chĕp kơ̆l teh đak, Kuôk hô̆i păng lơ̆m rim tơ drong jang Đảng, tơ ring păng tơ ƀơ̆p pơ ma dơ nuh đơ̆ng nghị sĩ tơ bôl, tơ ƀơ̆p pơ ma dơ nuh băl đơ̆ng kon pơ lei.

Kơ dră Kuôk hô̆i Vương Đình Huệ pơ ma dơ nuh hăm kơ dră tơm teh đak Ấn ĐộRam Nath Kovind

Hơ dai hăm drơ̆ng nơ̆r pơ gơ̆r rim tơ drong jang ‘lơ̆ng hơ iă tơ băt 50 sơ năm năr pơ jing tơ drong pơ vei jang tơ bôl lơ̆m sơ năm 2022. 2 păh pơ ma hơ dăh hơ nơ̆ng jang hơ dai kơ jăp păng tơ gŭm dih băl tơ̆ rim hop akŏm apŭng plĕnh teh păng tơ ring; Việt Nam păng Ấn Độ gô hơ nơ̆ng tơ gŭm rim tơ drong hơ drin pơ trŭt tơ drong sek tơ lang pơ ‘lơ̆ng rim tơ drong ưh kơ lăp băl ‘moi kiơ̆ rim trong jang rơ ngei, lăp hăm Khôi luơ̆t apŭng plĕnh teh.

Thuem: Tơ blơ̆