VOV4.Bahnar - ‘Năr dơ̆ng ‘năr 12/9, Kơ dră Kuôk hô̆i Vương Đình Huệ păng Khŭl tang măt gĭt kăl kơ Kuôk hô̆i teh đak bơ̆n hlôi brŏk truh tơ̆ cham gre păr Nội Bài, Hà Nội pơ tôch ‘lơ̆ng hơ iă ‘măng vang hop akŏm dôm Kơ dră Kuôk hô̆i apŭng plĕnh teh ‘măng mă 5 tơ̆ Cộng hòa Áo, tơ mang bơ̆ jang hăm Nghị viện châu Âu, teh đak Bỉ păng tơ mang tơ̆ Cộng hòa Phần Lan đơ̆ng ‘năr 5-11/9. ‘Măng năm tơ mang bơ̆ jang truh tơ̆ 3 teh đak châu Âu, mă lei Kơ dră Kuôk hô̆i Vương Đình Huệ păng khŭl tang măt gĭt kăl kơ Kuôk hô̆i teh đak bơ̆n hlôi bơ̆ jang hăm 5 teh đak jang hơ dai păng vang akŏm hloh 70 tơ drong jang kăl lơ pang, 2 pang.

‘Măng năm tơ mang bơ̆ jang tơ̆ 3 teh đak châu Âu đơ̆ng kơ dră Kuôk hô̆i Vương Đình Huệ hlôi jơ nei ‘lơ̆ng hơ iă

Mă loi ‘noh tơ̆ ‘măng năm tơ mang âu, Khŭl kơ dră teh đak Bỉ kơ tă pơ jao ăn kơ khŭl bơ̆ jang 100.000 kơ liêu vaccine. Khŭl kơ dră teh đak Slovakia asong 100.000 kơ liêu vaccine, 1,2 teh đak nai kŭm tŏk bŏk hơ len lăng tơ drong tơ gŭm Việt Nam vắc xin păng asong tơ mam tang găn jĭ. 1,2 grŭp jang, anih jang teh đak đe, rim anih jang mơ dro sa tih kơ Việt Nam oei tơ̆ teh đak đe kŭm hlôi răt asong dôm tơ mam pơ gang tang găn jĭ Covid-19 vă tơ gŭm ăn Việt Nam, hăm akŏp kơ jă đei hloh 1.028 ti hlak jên. 

Thuem: Tơ blơ̆