VOV4.Bahnar - Kơ sơ̆ ‘nâu, ‘năr 13/5, tơ̆ hnam Kuôk hô̆i, Kơ dră Kuôk hô̆i Vương Đình Huệ sơng pơ ma dơ nuh hăm Kơ dră tang măt Cộng hòa dân chủ nhân dân Lào tơ̆ Việt Nam Sengphet Houngboungnuang. Kơ dră Kuôk hô̆i Vương Đình Huệ hmach chơt hơ iă păng lăng ‘lơ̆ng tơ drong Lào hlôi pơ gơ̆r jơ nei ‘lơ̆ng hơ iă Hop akŏm ‘măng mă 11 Đảng kon pơ lei Cách mạng Lào păng ‘măng hop akŏm mă mônh, Kuôk hô̆i Lào jăl 9 hlôi pôk đei khŭl kơ dră chĕp kơ̆l jăl ‘nao đei bưng ai lơ păng tơ lĕch ăn lơ tơ drong jang, trong tơ gŭm gĭt kăl ăn jăl jang ‘nao.

Kơ dră Kuôk hô̆i Vương Đình Huệ sơng Kơ dră tang măt Lào

Kơ dră Kuôk hô̆i Vương Đình Huệ pơ ma hơ dăh, trong jang tơ gŭm kơ jăp, hơ drol đơ̆ng rŏng nhen 1 đơ̆ng Việt Nam ‘noh jĭ ling lang lăng kăl, ‘măn tơ gŭm hơ drol lơ hloh ăn tơ drong pơ vei tơ bôl gĭt kăl, tơ goăt tơ goăl păng jang hơ dai tôm tơ drong đơ̆ng Việt Nam-Lào. Kơ dră tang măt Lào tơ̆ Việt Nam bơ nê Kơ dră kuôk hô̆i Vương Đình Huệ hlôi ‘măn jơ sơng pơ ma dơ nuh; tơ ƀôh đon lui kơ jăp akhan, hăm tơ drong chĕp kơ̆l đơ̆ng 2 teh đak, tơ drong pơ vei jang tơ bôl, tơ goăt tơ goăl gĭt kăl, jang hơ dai tôm tơ drong gô roi ‘năr roi hơ tŏk tơ iung.

Thuem: Tơ blơ̆