VOV4.Bahnar - Pơ gê ‘năr 13/4, Kơ dră Kuôk hô̆i Vương Đình Huệ, Kơ dră Jơ nŭm vei lăng pôk rơ̆ih teh đak kŭm hăm khul dăr lăng, hơ len lăng kơ Anih chĕp kơ̆l pơ gơ̆r Kuôk hô̆i, Jơ nŭm vei lăng pôk rơ̆ih teh đak hơ len lăng tơ drong jang hơ met ăn pôk rơ̆ih Bơ ngai tang măt Kuôk hô̆i jăl 15, Bơ ngai tang măt Jơ nŭm pơ gơ̆r kon pơ lei tơ̆ rim tơ ring jăl jang 2021-2026 tơ̆ xăh Kiến Thiết păng apŭng Tiên Lãng, pơ lei tơm Hải Phòng. Kiơ̆ đơ̆ng tơ drong jang hơ len lăng, dăr lăng păng mơ̆ng tơ roi tơ băt đơ̆ng kơ dră chĕp kơ̆l xăh Kiến Thiết, apŭng Tiên Lãng, Kơ dră Kuôk hô̆i Vương Đình Huệ, Kơ dră Jơ nŭm vei lăng pôk rơ̆ih teh đak athei, Anih pơ gơ̆r jang pôk rơ̆ih apŭng, xăh hơ nơ̆ng jang hơ dai kơ jăp vă bơ̆ jang kiơ̆ ‘lơ̆ng tơ drong jang đơ̆ng kơ dih; dăr hơ len pơ ‘lơ̆ng ‘măng hơ tuch hơ năn bơ ngai tăh hla vang pôk rơ̆ih, vă vei sơ đơ̆ng tơ dro ng pơm tơm đơ̆ng kon pơ lei, ư̆h kơ lê̆ lon bơ ngai tăh hla. Kơ dră Kuôk hô̆i Vương Đình Huệ tơ tă, tơ drong jĭ Covid-19 lơ̆m apŭng plĕnh tĕh oei tôch kơ mơ mat tat. Jơ nŭm vei lăng pôk rơ̆ih teh đak gô jăh tơ lĕch tơ drong jang pơ gơ̆r pôk rơ̆ih tơ dăh jĭ Covid-19 đei ƀôh krê hơ mơt hăm dôm tơ drong pha ra băl vă pơ tho ăn kơ rim tơ ring.

Thuem: Tơ blơ̆