VOV4.Bahnar - Ƀlep ƀơ̆t năm tơ mang tơ̆ teh đak Ấn Độ, Kơ dră Kuôk hô̆i Vương Đình Huệ păng khŭl tang măt gĭt kăl kơ Kuôk hô̆i teh đak bơ̆n tơ mang tơ̆ kang ƀô̆, bơ ngai jang kơ Anih jang tang măt Việt Nam tơ̆ Ấn Độ, tơ ƀơ̆p tơ pôl bơ ngai Việt tơ̆ Ấn Độ. Pơ ma dơ nuh hăm kang ƀô̆, bơ ngai jang kơ Anih jang tang măt Việt Nam tơ̆ Ấn Độ, tơ pôl bơ ngai Việt tơ̆ Ấn Độ, Kơ dră Kuôk hô̆i Vương Đình Huệ pơ ma hơ dăh kon pơ lei jĭ sĕch hơ kar ưh kơ gơh tơ pleh, mă loi ‘noh jĭ hăm trong jang tơ gŭm tơ goăt đĭ đăng hơ drĕch hơ drŭng kơ Đảng păng teh đak bơ̆n kiơ̆ tơ drong Tơ chơ̆t 36 păng tơ chơ̆t 45 đơ̆ng Anih tơm Chĭnh trĭ găh tơ drong jang bơ ngai Việt Nam oei tơ̆ teh đak đe. Tơ̆ hơ năp kơnh, Kuôk hô̆i, Khŭl kơ dră teh đak gô athei rim anih jang ƀơm truh chih pơ kăh tơ drong jang khôi luơ̆t, hơ met ming hla ar bơ̆ jang, pơm tơ drong ‘lơ̆ng khôi luơ̆t drơ̆ng 1 nơ̆r, hrơ̆ch 1 ‘măng ăn tơ drong jang kiơ̆ păng dăr hơ len jang kiơ̆ khôi luơ̆t găh bơ ngai Việt Nam oei tơ̆ teh đak đe. Kơ dră Kuôk hô̆i hơ mĕng, tơ̆ hơ năp kơnh gô đei lăng ƀôh dôm tơ drong hơ iă ‘nao lơ̆m tơ drong pơ vei 2 teh đak, kŭm nhen lăng ƀôh dôm jơ nei tih hloh đơ̆ng đĭ đăng kang ƀô̆ jang lơ̆m anih jang tang măt kŭm nhen kon pơ lei bơ̆n tơ̆ Ấn Độ.

Thuem: Tơ blơ̆