VOV4.Bahnar - Gơ măng ‘năr 5/12, Anih tơ roi tơ băt Trung ương pơ gơ̆r Tơ drong jang pơ ma dơ nuh lơ̆m teh đak rim bơ ngai hơ gei lơ̆m hŏk pơ hrăm păng pơm kiơ̆ jơ hngơ̆m đon ‘lơ̆ng Hồ Chí Minh hăm hơ năn krao “Hồ Chí Minh - Tơ drong hơ pơi ‘meh sơ năm 2021". Lơ̆m prăt tơ drong jang ‘noh jĭ dôm tơ drong tơ roi ƀrơ̆k jơ hngơ̆m, hơ iă ƀok Hồ, găh dôm bơ ngai arih hmă đei tơ roi tơ drong hơ iă đơ̆ng jơ hngơ̆m đon ‘lơ̆ng  Hồ Chí Minh. Tang măt kơ dră chĕp kơ̆l Đảng, teh đak, Kơ dră Kuôk hô̆i Vương Đình Huệ hmach chơt hơ iă păng pôk pơ ư dôm khŭl grŭp, bơ ngai jang hơ gei ‘lơ̆ng lơ̆m teh đak păng kon pơ lei bơ̆n oei tơ̆ teh đak đe.

Lơ̆m kơ plăh jang kiơ̆ tơ drong tơ chơ̆t 05 găh “ Tŭn pran hŏk pơ hrăm păng pơm kiơ̆ jơ hngơ̆m đon ‘lơ̆ng Hồ Chí Minh”, hlôi păng tŏk bŏk đei ƀôh roi ‘năr roi lơ bơ ngai jang hơ gei ‘lơ̆ng, đei ƀơm truh pơ trŭt pơ lung kang ƀô̆ đảng viên păng kon pơ lei hơ drin hŏk pơ hrăm păng pơm kiơ̆ jơ hngơ̆m đon ‘lơ̆ng Hồ Chí Minh. Kơ dră Kuôk hô̆i Vương Đình Huệ ‘meh vă Anih tơ roi tơ băt Trung ương păng rim anih jang hơ nơ̆ng pơ vei păng hơ tŏk hloh dơ̆ng dôm tơ drong jang ‘lơ̆ng hơ iă âu.

Thuem: Tơ blơ̆