VOV4.Bahnar - Lơ̆m 2 năr, ‘năr 9.9 kiơ̆ jơ tơ ring, Kơ dră Kuôk hô̆i Vương Đình Huệ păng Khŭl tang măt kơ dră kơ pal Kuôk hô̆i Việt Nam hlôi vang pơ ma đam hăm anih jang mơ dro sa Việt Nam - Bỉ. Pơ ma hăm rim anih jang mơ dro sa tih hloh kơ Bỉ, Kơ dră Kuôk hô̆i Vương Đình Huệ lăng ‘lơ̆ng trong jang pơ gơ̆r pơ ma đam, lăng ‘nâu jĭ tơ drong hiôk ‘lơ̆ng vă hơ dai hăm vang tơ gŭm găh dôm trong tơ mơ̆t jên jang ‘nao, trong jang hơ met ming hơ nih tơ mơ̆t jên jang đơ̆ng Việt Nam, hơ dai hăm ‘noh tơ lĕch ăn dôm nơ̆r athei vă hơ tŏk ‘lơ̆ng đei yua jang hơ dai, yak truh tơ drong jơ nei đơ̆ng rim anih jang mơ dro sa Bỉ mưh tơ mơ̆t jên jang păng tĕch mơ dro tơ̆ Việt Nam. Vă hơ tŏk loi dơ̆ng tơ drong pơ vei mŭk drăm, mơ dro sa, tơ mơ̆t jên jang đơ̆ng Việt Nam păng Bỉ tơ̆ hơ năp kơnh, tơ gĕch iŏk dôm tơ drong hiôk ‘nao đơ̆ng rŏng jĭ hơ buh Covid – 19, Kơ dră Kuôk hô̆i Vương Đình Huệ hlôi tơ ƀôh 1,2 trong vă jang tơ̆ hơ năp kơnh. Lơ̆m noh athei anih mơ dro sa păng rim Khŭl jang mơ dro sa Bỉ tơ gŭm pran kơ tang vă Nghị viện Bỉ jăh pơm pơ keh đĭ dôm hla ar yak truh kĭ ăn tơ chơ̆t vei lăng tơ gŭm tơ mơ̆t jên jang đơ̆ng Việt Nam păng EU (EVIPA) tơ̆ hơ năp kơnh hrôih hloh. Set hơ len pơ̆ih trong păr tơ păt đơ̆ng Bỉ păng Việt Nam vă pơ trŭt rim tơ drong jang hơ dai mŭk drăm, tơ mang lăng, pơ tho pơ hrăm, tơ ƀơ̆p pơ ma dơ nuh đơ̆ng kon pơ lei tơ gŭm 2 teh đak rĭ tơ jê̆ băl dơ̆ng mưh jĭ hơ buh đei vei lăng.

Thuem: Tơ blơ̆