VOV4.Bahnar - Pơ gê ‘năr 16/11, tơ̆ pơ lei tơm Hồ Chí Minh, Kơ dră teh đak Nguyễn Xuân Phúc kŭm hăm Grŭp tang măt Kuôk hô̆i pơ lei tơm Hồ Chí Minh anih jang kơ sô̆ 10 păng kơ sô̆ 2 tơ ƀơ̆p pơ ma dơ nuh hăm bơ ngai tăh hla apŭng Củ Chi, Hóc Môn, Quận 1, Quận 3 păng Quận Bình Thạnh kiơ̆ trong kơ tă păng trực tuyến, tơ roi tơ băt hăm bơ ngai tăh hla găh pơ tôch ‘măng hop akŏm mă 2, Kuôk hô̆i jăl 15. Tơ̆ jơ tơ ƀơ̆p pơ ma dơ nuh, Kơ dră teh đak Nguyễn Xuân Phúc akhan, rim quận, apŭng athei tơ klăh dôm tơ drong jang hơ dai jing dôm tơ drong hơ găt mă hơ dăh vă tơ lĕch jang kiơ̆. Mă loi ‘noh pơ lei tơm Hồ Chí Minh kăl tang găn hiă tơ drong kơ nê̆ ‘noh jĭ đei ƀôh ‘măng jĭ COVID-19 ‘măng mă 5 gô đei ƀôh. Kơ dră teh đak Nguyễn Xuân Phúc 1 ‘măng dơ̆ng tơ ƀôh jơ hngơ̆m đon vang tơ gŭm hăm dôm tơ drong ơh sơ ‘ngon hiong răm kơ tang đơ̆ng Đảng bộ, khŭl kơ dră păng kon pơ lei pơ lei tơm Hồ Chí Minh păng tơ băt, Khŭl chĕp kơ̆l pơ gơ̆r Ban Bí thư hlôi tơ chơ̆t pơ gơ̆r lêh ƀlŏk hơ dơ̆r kơ kon pơ lei lôch răm păng kang ƀô̆, khŭl linh plang hơ kâu lôch lơ̆m jĭ hơ buh COVID-19 lơ̆m ‘năr 19/11 truh. Vă tơ iung mŭk drăm đei yua, Kơ dră teh đak akhan, pơ lei tơm Hồ Chí Minh kăl tơ iung 1 tơ drong jang tŏk kơ pơ lei tơm lơ̆m trong jang tơ mơ̆t jên jang, răt yua, tĕch tơ lĕch tơ̆ teh đak đe. Lơ̆m noh kăl akŏm lơ tơ mam pơ yua ăn năr Tết Nguyên Đán vă jê̆ truh.

Thuem: Tơ blơ̆