VOV4.Bahnar - Kơ sơ̆ ‘năr 29/7, tơ̆ pơ lei tơm Hồ Chí Minh, Kơ dră teh đak Nguyễn Xuân Phúc hlôi tơ mang tơ̆ Đảng bộ, kon pơ lei pơ lei tơm Hồ Chí Minh tŏk bŏk hơ drin tang găn jĭ COVID-19, lơ̆m noh đei 2 apŭng Hóc Môn păng Củ Chi. Kơ dră teh đak kŭm hlôi krao hơ vơn bơ ngai tơ gŭm asong 1 pŭng 5 ti hlak jên, 5 tŏ kơ măy dui jơ hngơ̆m. Akhan tơ dăh ư̆h kơ jang kiơ̆ tơ drong tơ chơ̆t 16 lơ̆m 2 giĕng âu ki, pơ lei tơm Hồ Chí Minh gô oei hiong răm yua đơ̆ng jĭ hơ buh lơ hloh, Kơ dră teh đak athei kon pơ lei pơ lei tơm hơ nơ̆ng jang kiơ̆ tơ păt tơ drong tơ chơ̆t âu. Kơ dră teh đak Nguyễn Xuân Phúc athei pơ lei tơm hơ tŏk jơ hngơ̆m đon tơ goăt tơ goăl, hơ nơ̆ng pơ jing rim grŭp tơ jră jĭ Covid-19 lơ̆m tơ ring vă năm tơ̆ rim trong, tơ teh rim ‘măng, hơ len rim hnam, tơ tĕnh chă ƀôh , tơ chă, gơ var tơ ring găn jĭ hơ buh. Kŭm lơ̆m kơ sơ̆ ‘năr 29/7, tơ̆ pơ lei tơm Hồ Chí Minh, Kơ dră teh đak Nguyễn Xuân Phúc năm tơ mang păng bơ̆ jang tơ̆ Kŏng ti kơ măy kơ mŏk sinh học pơ gang Nanogen, anih jang tŏk bŏk lơ̆m kơ plăh pơ long lăng vắc xin nanocovax. Kơ dră teh đak athei Anih tơm vei lăng găh jang pơ gang pơm tơ drong hiôk găh hla ar ăn Kŏng ti pơ long lăng vắc xin jăl jang 3, mă lei oei athei vei sơ đơ̆ng ƀlep trong jang, yua kơ ƀơm kơ tă truh jơ hngơ̆m jăn kon pơ lei. Kơ dră teh đak kŭm athei Kŏng ti Nanogen hơ nơ̆ng jang đang găh kơ măy kơ mŏk, pơm tơ lĕch vắc xin ‘lơ̆ng hloh, tang găn tôch ai đei blơ̆ đơ̆ng pơ gang. ‘Ngoăih kơ pơ yua ăn lơ̆m teh đak ‘noh athei jô̆ truh yak hơ tăih hloh ‘noh jĭ tĕch tơ lĕch vắc xin tơ̆ teh đak đe.

Thuem: Tơ blơ̆