VOV4.Bahnar - Kơ sơ̆ 14/9, Kơ dră tĕh đak Nguyễn Xuân Phúc bơ̆ jang hăm kơ dră chĕp kơ̆l Anih tơm sek tơ lang kon pơ lei, Anih jang kơ ƀok Kơ dră tĕh đak, Anih jang Nô̆i chinh Trung ương, Anih tơm dăr hơ len kon pơ lei, Anih tơm vei lăng Công an păng Anih jang Tư phap kơ Kuô̆k hô̆i găh tơ lĕch trong jang hơ doi đơ̆ng dôm anih jang tơ̆ Trung ương ƀơm truh tơ drong pơm hla ar hăm bơ ngai đei nơ̆r athei phak pơ lôch kiơ̆ tơ drong hơ găt đơ̆ng luơ̆t.

Kơ dră tĕh đak Nguyễn Xuân Phúc pơ ma lơ̆m hop akŏm

Kơ dră tĕh đak Nguyễn Xuân Phúc pơ ma hơ dăh Hla ar phak pơ lôch ‘nŏh jĭ tơ drong đei kon pơ lei păng Quốc hội tôch tơ rĕk. Yoa thoi nŏh, Anih tơm sek tơ lang kon pơ lei, Anih tơm dăr hơ len kon pơ lei, Anih tơm vei lăng Công an păng Anih jang kơ ƀok Kơ dră tĕh đak hơ nơ̆ng jang hơ doi mă ‘lơ̆ng, tơ lĕch đei trong jang mă hơ dăh ƀiơ̆ ăn dôm anih jang tơ̆ Trung ương.

Đơ̆ng rŏng kơ hop akŏm âu athei hơ tŏk tơ drong jang hơ doi mă kơ jăp mưh pơm hla ar, ưh gơ̆h lê̆ đei tơ drong tơ chơ̆t pơm mơ mat tat mưh pơ gơ̆r jang kiơ̆ nơ̆r sek phak. Kơ dră tĕh đak athei mưh bơ̆ jang tơ drong jang đei pơ jao, dôm anih jang athei hơ len năng mă hơ dăh, mă ‘lơ̆ng vă đơ̆ng nŏh gơ̆h đei trong tang găn dôm tơ drong yoch kŭm nhen hơ len năng nơ̆r apinh, athei hơ met ming tơ drong hơ găt đơ̆ng luơ̆t đei ƀơm truh.

Dơ̆ng: Tơ blơ̆