VOV4.Bahnar - ‘Năr 30/5, Kơ dră tĕh đak Nguyễn Xuân Phúc đei kơ thơ gơih ăn Kơ dră tơm Mi Joe Biden pơ ma găh tơ drong pơ vei 2 păh, mă loi ‘nŏh hơ tŏk tơ drong jang hơ doi vang tơ jră hăm jĭ Covid-19. Lơ̆m kơ thơ, Kơ dră tĕh đak hôn bơ nê Mi vang tơ gop tôch lơ mưh pơ kăp tơ gŭm 4 ti USD ăn tơ drong pơ chĕh Gơ̆h sơng iŏk jơ̆p plei tĕh hăm Vaccine Covid-19 (COVAX) păng roi tơ băt hăm Kơ dră tơm Joe Biden tơ drong Việt Nam hlôi iŏk đei 2 đơt vaccine hăm dang 2,5 triu kơ liêu đơ̆ng tơ drong pơ chĕh ‘nâu.

Kơ dră tĕh đak bơ̆n ƀok Nguyễn Xuân Phúc

Kơ dră tĕh đak Nguyễn Xuân Phúc hơ pơi ‘mĕh Mi hơ nơ̆ng tơ gŭm ăn Việt Nam păng dôm tĕh đak găh vaccine, atŭm hăm ‘nŏh athei 2 păh hơ tŏk tơ drong jang hơ doi vang tơ chĕng hơ len, pơm tơ lĕch păng pơ truh kơ măy pơm vaccine tang găn jĭ Covid-19. Kơ dră tĕh đak pơ ma hơ dăh, Việt Nam ling lang năng kăl tơ drong pơ vei jang hơ doi gĭt kăl tôm tơ drong hăm Mi păng lui kiơ̆ đơ̆ng jơ hngâm đon jang hơ doi ‘lơ̆ng, 2 păh hơ nơ̆ng hơ tŏk tơ drong pơ vei 2 pang roi đunh roi ‘lơ̆ng, hơ nhăk tơ drong đei yoa ăn kon pơ lei 2 păh, tơ gop ăn tơ drong rơ ngei, sơ đơ̆ng, jang hơ doi păng jang tŏk tơ̆ tơ ring păng lơ̆m apŭng plenh tĕh.

Dơ̆ng: Tơ blơ̆