VOV4.Bahnar - Adrol kơ Noel sơ năm 2021, sơng sơ năm ‘nao 2022, pơ gê 23/12, Kơ dră tĕh đak Nguyễn Xuân Phúc truh hơ pong, asong tơ mam păng hơ iă Lêh Noel hăm Hnam khop tơm Hà Nội păng Anih tơ guăt tơ drong lui kŏng yăo Việt Nam.

Kơ dră tĕh đak Nguyễn Xuân Phúc truh hơ pong, hơ iă hăm Hnam khop tơm Hà Nội

Năm ngôi tơ̆ Hnam khop tơm Hà Nội, Kơ dră tĕh đak Nguyễn Xuân Phúc pơ truh nơ̆r hmach thơ thou hăm Ƀok soi tơm Giuse Vũ Văn Thiên, Ƀok soi vei lăng tơ ring khop Hà Nội, Phŏ Tổng Thư ký Khul ƀok soi Việt Nam; đe ƀok soi, yă giĕng, bơ ngai hŏk tơ drong lui păng bơ ngai tang măt ăn dôm tơ ring kiơ̆ khop găh Hnam khop tơm Hà Nội sơng 1 pơ yan Noel chơt hơ iă, sơ đơ̆ng ‘lơ̆ng, ƀĕnh tơ drong pŭn ai đơ̆ng ƀă yang tơ jur.

Pơ ma hơ dăh, Đảng, Tĕh đak ling lang pơm ‘lơ̆ng tơ drong gơ̆h pơ gơ̆r lui khop mơ̆ng kơ vă đơ̆ng kon pơ lei ‘moi kiơ̆ khôi luơ̆t tơm păng luơ̆t tĕh đak, Kơ dră tĕh đak chơt hơ iă mưh ƀôh, kiơ̆ rim chăl lơ̆m jơ hnơr arih, kon pơ lei kiơ̆ lui kŏng yăo ling lang yak hơ doi hăm tơ drong tơ iung pơ jing păng vei lăng tĕh đak; arih xa ‘lơ̆ng, lui kơ jăp. Dôm hnam khop, tơ ring kiơ̆ khop pơ gơ̆r lơ tơ drong jang tơ gŭm tôch ‘lơ̆ng; mă loi kŭm hăm dôm khul jang kơ pal vang bơ̆ jang tang găn jĭ COVID-19, hơ nhăk lơ jơ hngâm đon ‘lơ̆ng, um rup hơ iă hăm kon pơ lei.

Dơ̆ng: Tơ blơ̆