VOV4.Bahnar - Kơ sơ̆ 1/7, tơ̆ Anih jang kơ ƀok Kơ dră tĕh đak, Kơ dră tĕh đak Nguyễn Xuân Phúc, Kơ dră Anih pơ gơ̆r chih tơ lĕch tơ drong jang đei jơ bơ̆ jang hăm lơ giáo sư, phó giáo sư, tiến sỹ, dôm bơ ngai juăt jang khoa hŏk, kơ măy kơ mŏk vă mơ̆ng nơ̆r pơ ma tơ gop ăn Tơ drong jang pơ jing păng hơ met pơ ‘lơ̆ng tĕh đak chĕp kơ̆l pơ gơ̆r kiơ̆ khôi luơ̆t XHCN.

Pơ ma lơ̆m jơ bơ̆ jang, Kơ dră tĕh đak Nguyễn Xuân Phúc akhan, Tơ drong jang âu jĭ tơ drong jang tơm lơ̆m tơ drong hơ met ming trong jang tư pháp, hơ nơ̆ng pơ jing tĕh đak chĕp kơ̆l pơ gơ̆r kiơ̆ luơ̆t xã hội chủ nghĩa Việt Nam. Hăm jơ hngâm đon ‘nŏh, Kơ dră tĕh đak athei dôm bơ ngai juăt jang, bơ ngai jang khoa hŏk tơ gop ăn 1,2 tơ drong kăl vă tơ chĕng hơ len, tơ lĕch trong jang kiơ̆; klăih song anih jang vang bơ̆ jang… păng dôm tơ drong kăl nai mă bơ ngai juăt jang, bơ ngai jang khoa hŏk ‘mĕh tơ gop nơ̆r.

Kơ dră tĕh đak pơ ma hơ dăh, dôm nơ̆r tơ gop lơ̆m jơ bơ̆ jang âu gô đei chih iŏk tôm lơ̆m tơ drong chih pơ kĕh trong vă jang. Anih pơ gơ̆r vă hơ nơ̆ng iŏk nơ̆r tơ gop đơ̆ng dôm bơ ngai juăt jang, bơ ngai jang khoa hŏk, pơih lơ hop akŏm pơ ma găh 1,2 tơ drong nai vă hơ nơ̆ng chih iŏk nơ̆r tơ gop ăn tơ drong jang ‘nâu.

Dơ̆ng: Tơ blơ̆