VOV4.Bahnar - Lơ̆m ‘măng năm hơ pong tơ̆ tĕh đak Cộng hòa dân chủ nhân dân Lào, Kơ dră tĕh đak Nguyễn Xuân Phúc păng hơ kăn ƀok truh ngôi, jet gia pơ ma nuh hăm bơ ngai jang lơ̆m Anih tang măt Việt Nam tơ̆ Lào păng bơ ngai tang măt ăn tơ pôl Việt Nam, bơ ngai tĕch mơ dro, đe hŏk tro Việt Nam oei jang xa, hŏk pơ hrăm tơ̆ Lào. Kơ dră tĕh đak Nguyễn Xuân Phúc pơ ma hơ dăh, ‘măng năm hơ pong đei jơ nei tôch ‘lơ̆ng, tơ drong ‘nâu gơ nơm đơ̆ng tơ drong tơ gop păng bơ̆ jang đei yoa đơ̆ng Anih tang măt, kŭm hăm tơ drong tơ gŭm đơ̆ng tơ pôl bơ ngai Việt Nam oei arih xa, bơ̆ jang tơ̆ Lào.

Kơ dră tĕh đak pơ ma hơ dăh 100 rơ bâu ‘nu bơ ngai Việt Nam tơ̆ Lào hơ nơ̆ng hue lăng truh tơ̆ tĕh đak kơ dih, păng tơ gŭm tôch ai ăn kon pơ lei lơ̆m tĕh đak mưh tơ ƀâp mơ mat tat yoa đơ̆ng sar bar tŏ ‘mi kial kơ nê̆ păng jĭ Covid-19. Hăm jơ hngâm đon ‘lơ̆ng ‘nŏh, Kơ dră tĕh đak Nguyễn Xuân Phúc hơ pơi ‘mĕh tơ pôl kon pơ lei tơ̆ âu hơ nơ̆ng tưk tơ iung tơ drong juăt ‘lơ̆ng, vă rim bơ ngai kon hơ ‘lơ̆p groi tĕh Việt arih xa păng bơ̆ jang tơ̆ Lào jing khul grŭp rơ gei, đei đon ‘lơ̆ng, tơ găl hăm bơ ngai Việt Nam.

Dơ̆ng: Tơ blơ̆