VOV4.Bahnar - Lơ̆m năr pôk rơ̆ih 23/5, Kơ dră teh đak Nguyễn Xuân Phúc gô tăh kơ phiê̆u tơ̆ apŭng Củ Chi, pơ lei tơm Hồ Chí Minh. ‘Nâu jĭ kơ tơ̆ng ang đei bơ ngai tang măt Anih vei lăng pôk rơ̆ih apŭng Củ Chi tơ roi tơ̆ ‘măng hop akŏm mă 13 kơ Anih vei lăng pôk rơ̆ih pơ lei tơm Hồ Chí Minh pơ gơ̆r kơ sơ̆ 18/5. Kiơ̆ kơ Anih vei lăng pôk rơ̆ih apŭng Củ Chi, lơ̆m ‘năr 23/5, hơ nih mă Kơ dră teh đak tăh kơ phiê̆u ‘noh jĭ tơ̆ kueng kơ phô̆ 7, thị trấn Củ Chi, apŭng Củ Chi. Rim khŭl jang kŏng an, khŭl linh hlôi đei klăih song jang hơ năp jang hơ dăh tơ̆ hơ nih mă Kơ dră teh đak tăh kơ phiê̆u. Hăm tơ drong tăh kơ phiê̆u tơ̆ Hnam pơ gang pơm tơ̆ ‘ngoăih Củ Chi, apŭng gô hơ nhăk kơ thŭng kơ phiê̆u pôk truh, ăn thim 1 grŭp tăh kơ phiê̆u 2 ‘nu y tá, ƀak si tơ̆ găh lơ̆m vă bơ̆ jang jô̆ hơ len kơ phiê̆u. Bơ ngai tăh hla gô đei axong ‘long chih, ‘long rek yua 1 ‘măng. Tơ̆ pơ lei tơm Hồ Chí Minh, Kơ dră teh đak Nguyễn Xuân Phúc jĭ bơ ngai lĕch pơ jei pơm bơ ngai tang măt kuôk hô̆i jăl 15 anih jang kơ sô̆ 10 ( apŭng Củ Chi păng apŭng Hóc Môn).

Thuem: Tơ blơ̆