VOV4.Bahnar - Sơng iŏk nơ̆r krao hơ vơn đơ̆ng Tổng Bí thư, Kơ dră tĕh đak Lào Thongloun Sisoulith, pơ hei, 9/8, Kơ dră tĕh đak Nguyễn Xuân Phúc kŭm hăm hơ kăn ƀok chĕp kơ̆l khul tang măt ăn Việt Nam lĕch đơ̆ng Hà Nội năm hơ pong tơ̆ tĕh đak Cộng hòa Dân Chủ Nhân dân Lào đơ̆ng ‘năr 9 - 10/8. ‘Nâu jĭ ‘măng năm hơ pong tơ̆ tĕh đak đe mă blŭng đơ̆ng Kơ dră tĕh đak Nguyễn Xuân Phúc hăm kơ chư̆k ‘nao, tơ ƀôh hơ dăh đon năng kăl đơ̆ng Đảng, tĕh đak păng kon pơ lei Việt Nam hăm tơ drong pơ vei kăp gĭt, jang hơ doi tôm tơ drong đơ̆ng Việt Nam- Lào.

Kơ dră tĕh đak Nguyễn Xuân Phúc păng Tổng Bí thư, Kơ dră tĕh đak Lào Thongloun Sisoulith

Lơ̆m ‘măng năm hơ pong, dôm kơ dră chĕp kơ̆l 2 tĕh đak vă pơ ma nuh găh tơ drong hơ nơ̆ng pơm hơ tŏk tơ drong pơ vei chinh trĭ, jang tơ bôl, mă loi ‘nŏh ƀât oei đei jĭ COVID-19 hrei ‘nâu, jing tơ drong kăl vă tưk tơ iung tơ drong pơ vei, jang hơ doi đơ̆ng 2 tĕh đak lơ̆m rim tơ drong nhen tĕch mơ dro, tơ mât jên jang; khul linh vei lăng sơ đơ̆ng tĕh đak; joh ayŏ kơ dŏ xoang; pơ tho pơ hrăm, jang pơ gang; jang hơ doi lơ̆m apŭng plenh tĕh, tơ̆ tơ ring. ‘Măng năm hơ pong tơ gop gĭt kăl vang vei kơ jăp tơ drong juăt ‘lơ̆ng hơ iă păng tơ drong pơ vei tôch gĭt kăl Lào - Việt Nam.

Dơ̆ng: Tơ blơ̆