VOV4.Bahnar - Kơ dră tĕh đak Nguyễn Xuân Phúc ‘nao truh hơ pong xăh tơ ring tơ rang ‘nao Tứ Xã, apŭng Lâm Thao, dêh char Phú Thọ. Tơ chĕng ‘lơ̆ng khei ‘năr âu ki, Đảng ƀô̆, khul kơ dră păng kon pơ lei xăh tơ guăt 1 ƀơ̆r đon, akŏm jơ hngâm pơ jing tơ ring tơ rang ‘nao păng jang kĕh lăp 4 sơ năm đĕch, Kơ dră tĕh đak athei xăh Tứ Xã, apŭng Lâm Thao păng dêh char Phú Thọ tơ chĕng hơ len tơ drong atŏk tơ iung xăh tơ ring tơ rang ‘nao ‘lơ̆ng rŏ nhen thoi tơ ring kơ drâm ‘moi kiơ̆ khoa hŏk păng lăp hăm trong vă jang atŏk tơ iung mŭk drăm, tơ pôl. 

Kơ dră tĕh đak Nguyễn Xuân Phúc jet gia pơ ma nuh hăm kon pơ lei

Adrol kơ tơ ƀâp kon pơ lei xăh Tứ Xã tơ̆ Kueng kơ sô̆ 7, Kơ dră tĕh đak Nguyễn Xuân Phúc năm hơ pong tơ̆ 1,2 anih nhen kơ chơ, cham đă ƀŏng lŏng, dăr lăng trong lơ̆m xăh. Tang măt ăn kơ dră chĕp kơ̆l Đảng, Tĕh đak, ƀok Nguyễn Xuân Phúc hơ iă hăm Đảng ƀô̆, khul kơ dră păng kon pơ lei xăh Tứ Xã, apŭng Lâm Thao găh dôm tơ drong hlôi jang đei lơ̆m tơ drong pơ jing tơ ring tơ rang ‘nao khei ‘năr âu ki. Kơ dră tĕh đak, tơ chĕng ‘lơ̆ng hăm dêh char Phú Thọ lơ̆m tơ drong jang atŏk tơ iung mŭk drăm, tơ pôl, năng kăl tơ drong pơ jing tơ ring tơ rang 'nao.

Dơ̆ng: Tơ blơ̆