VOV4.Bahnar - Kơ dră teh đak Nguyễn Xuân Phúc ‘nao pơ gơ̆r ‘Măng hop akŏm mă pêng Jơ nŭm vei lăng sơ đơ̆ng teh đak jăl jang 2016-2021. Kơ dră teh đak tơ băt ‘Măng hop akŏm ‘măng mă 3 âu đei pơ tôch đơ̆ng jăl jang; hơ dai hăm pơ ma dơ nuh, drơ̆ng nơ̆r dôm tơ drong gĭt kăl, pơm tơ drong ‘lơ̆ng ăn tơ drong jang đơ̆ng Jơ nŭm vei lăng sơ đơ̆ng teh đak lơ̆m jăl jang ‘nao jang đang ‘lơ̆ng tơ drong jang kiơ̆ tơ drong hơ găt đơ̆ng khôi luơ̆t  teh đak. kơ dră teh đak Nguyễn Xuân Phúc pơ ma hơ dăh, lơ̆m khei ‘năr hrei ‘nâu, teh đak tŏk bŏk dơ̆ng tơ̆ hơ năp lơ long nol găh vei sơ đơ̆ng joăt joe păng ư̆h kơ joăt joe, lơ̆m noh đei tơ plih tŏ ‘mi kial, mă loi ‘noh jĭ hơ buh  Covid-19 tŏk bŏk đei ƀôh krê hơ mơt jing tơ drong tih kơ teh đak.

‘Măng hop akŏm mă pêng Jơ nŭm vei lăng sơ đơ̆ng teh đak jăl jang 2016 - 2021

Tơ drong ‘nâu athei khŭl linh, mă loi ‘noh jĭ ƀô̆ đô̆i, kŏng an păng jang tơ bôl athei akŏm bơ ngai jang vă tơ jră, vei lăng ‘lơ̆ng hloh jơ hngơ̆m pran păng hơ kâu jăn kơ kon pơ lei. Tơ̆ hơ năp đei ƀôh jĭ COVID-19 tơ̆ lơ dêh char găh pơ băh, Kơ dră teh đak Nguyễn Xuân Phúc athei Khŭl kơ dră teh đak, rim anih tơm, anih jang păng khŭl kơ dră rim tơ ring tơ gŭm hơ drol rim bơ ngai jang tang găn jĭ, mă loi ‘noh jĭ vei sơ đơ̆ng tôm vắc xin ƀet bơ̆ng ăn kon pơ lei.  

Thuem: Tơ blơ̆