VOV4.Bahnar - Lơ̆m ‘măng năm hơ pong tơ̆ Nga, kơ sơ̆ 30/11 tơ̆ Mát-xcơ-va, Kơ dră tĕh đak Nguyễn Xuân Phúc đei jơ pơ ma đam hăm Kơ dră tơm tĕh đak Nga Vladimir Putin.

Kơ dră tĕh đak Nguyễn Xuân Phúc păng Kơ dră tơm tĕh đak Nga Vladimir Putin

Tơ̆ jơ pơ ma đam, 2 ‘nu kơ dră chĕp kơ̆l tơ chĕng ‘lơ̆ng tơ drong jang hơ doi găh khul linh, vei lăng sơ đơ̆ng kơ 2 tĕh đak hlôi iŏk đei jơ nei gĭt kăl, pơm pơ ‘lơ̆ng hlŏh dơ̆ng tơ drong pơ vei chinh trĭ tôch lui băl đơ̆ng 2 tĕh đak păng pơ ma hơ dăh đon pơ hnŏng hơ nhăk tơ drong jang hơ doi mŭk drăm tŏk jing tơ drong jang kăl hlŏh lơ̆m tơ drong pơ vei Việt Nam -Nga. Ƀar ‘nu kơ dră chĕp kơ̆l pơ ma hơ dăh unh hơ yuh păng kơ chơ̆t sŏh oei hơ nơ̆ng jing tơ drong tơm lơ̆m tơ drong pơ vei Jang hơ doi gĭt kăl tôm tơ drong, hơ nhăk tơ drong đei yoa ‘lơ̆ng ăn 2 tĕh đak.

Pơ tôch pơ ma đam, Kơ dră tĕh đak Nguyễn Xuân Phúc păng Kơ dră tơm Putin tơ lĕch nơ̆r tơ chơ̆t atŭm găh Trong jang pơ vei, jang hơ doi gĭt kăl tôm tơ drong Việt Nam-Nga truh sơ năm 2030, vă tơ ƀôh trong ăn tơ drong jang hơ doi tôch lui băl đơ̆ng 2 tĕh đak lơ̆m rim tơ drong roi đunh roi ‘lơ̆ng, đei yoa tơ pă, pơm lăp hăm tơ drong đei yoa đunh đai đơ̆ng 2 tĕh đak, 2 hơ drĕch hơ drung, tơ gop ăn tơ drong rơ ngei, sơ đơ̆ng păng jang tŏk kơ jăp tơ̆ tơ ring păng lơ̆m apŭng plenh tĕh.

Dơ̆ng: Tơ blơ̆