VOV4.Bahnar - Kơ sơ̆ ‘năr 15/07, tơ̆ Anih jang kơ dră teh đak, ƀok Kơ dră teh đak Nguyễn Xuân Phúc hlôi đei ‘măng pơ ma điên thoăi hăm Kơ dră tơm teh đak Cộng hòa Indonesia Joko Widodo găh jang hơ dai 2 pang kŭm nhen rim tơ drong lơ̆m tơ ring păng apŭng plĕnh teh vang bơ ngơ̆t truh. 2 kơ dră chĕp kơ̆l drơ̆ng nơ̆r kăl kơ hŏk loi dơ̆ng jang hơ dai, vang tơ gŭm tơ drong hlôh vao lơ̆m tơ jră jĭ Covid-19 păng gơ̆h iŏk yua vắc-xin jơ nei. Kơ dră tơm Joko Widodo lăng ‘lơ̆ng jang đei đơ̆ng Việt Nam lơ̆m jang kiơ̆ tơ drong jang hơ dai, vei lăng ‘lơ̆ng jĭ hơ buh hai, hơ tŏk tơ iung mŭk drăm tơ pôl hai. Kơ dră teh đak Nguyễn Xuân Phúc vang tơ gŭm hăm dôm tơ drong mơ mat tat mă Indonesia tŏk bŏk athei tơ jră lơ̆m tơ drong jang tang găn Covid-19; lui ngeh akhan Indonesia gô jăh vei lăng đei jĭ hơ buh păng tơ iung ming mŭk drăm. Kơ dră teh đak bơ nê kơ Indonesia hlôi jang hơ dai ‘lơ̆ng hăm Việt Nam lơ̆m tơ drong jang vei lăng tơ gŭm kon pơ lei tơ ƀơ̆p pơ ma nat tat yua đơ̆ng jĭ COVID-19; athei Indonesia hơ nơ̆ng pơm tơ drong hiôk ăn kon pơ lei Việt Nam tơ̆ Indonesia đei khăm hơ met jĭ, ăn oei hơ drô̆ păng hơ met mư̆h kăl.

Thuem: Tơ blơ̆