VOV4.Bahnar - ‘Năr 24-5, Kơ dră teh đak Nguyễn Xuân Phúc hlôi pơ ma điên thoăi hăm Kơ dră teh đak Trung Quốc Tập Cận Bình. Tơ̆ jơ pơ ma điên thoăi, Kơ dră teh đak Nguyễn Xuân Phúc pơ ma hơ dăh Đảng păng teh đak Việt Nam vei kơ jăp trong jang tơ bôl hiôk hian, pơm tơm kơ dih, lơ trong, lơ̆m noh lăng kăl hơ tŏk tơ iung tơ drong pơ vei tơ bôl, jang hơ dai tôm tơ drong hăm Trung Quốc. Kơ dră teh đak tơ roi 1,2 trong jang kăl pơ trŭt tơ drong pơ vei 2 teh đak tơ̆ hơ năp kơnh nhen hơ tŏk đon lui băl, pơ trŭt jang hơ dai tôm tơ drong, hơ tŏ hơ nơ̆ng, vang đei yua.

Kơ dră teh đak Nguyễn Xuân Phúc pơ ma điên thoăi hăm Tổng Bí thư, Kơ dră teh đak Trung Quốc

Tổng bí thư, Kơ dră teh đak Trung Quốc Tập Cận Bình tơ ƀôh đon lui hăm tơ drong chĕp kơ̆l hơ gei đơ̆ng Đảng Cộng sản Việt Nam, kon pơ lei Việt Nam gô bơ̆ jang jơ nei rim tơ drong hơ găt, hơ năp jang hop akŏm Đảng ‘măng mă 13 tơ lĕch ăn. Ƀok pơ ma hơ dăh Đảng, teh đak păng kon pơ lei Trung Quốc lăng kăl tơ drong pơ vei hăm Việt Nam, ‘mĕh vă păng khŏm hơ drin kŭm hăm Đảng, teh đak păng kon pơ lei Việt Nam hơ nơ̆ng hơ tŏk loi dơ̆ng tơ drong pơ vei tơ bôl păng jang hơ dai đơ̆ng teh đak, hơ nhăk tơ drong pơ vei jang hơ dai tôm tơ drong Việt Nam - Trung Quốc hơ tŏk tơ iung hloh dơ̆ng.

Thuem: Tơ blơ̆