VOV4.Bahnar - Kơ sơ̆ ‘năr 21/12/2021, lơ̆m jơ năr năm tơ mang tơ̆ teh đak Campuchia, Kơ dră teh đak Nguyễn Xuân Phúc hlôi đei jơ pơ ma dơ nuh hăm Kơ dră Thượng viện Campuchia Say Chhum. Tơ̆ jơ pơ ma dơ nuh, 2 kơ dră chĕp kơ̆l chhôk hơ iă lăng ƀôh, lơ̆m khei ‘năr jĭ Covid-19 đei ƀôh krê hơ mơt, jang hơ dai đơ̆ng 2 teh đak oei vei đei hơ tŏk tơ iung ‘lơ̆ng lơ̆m đĭ đăng rim tơ drong jang.

Pơ ma dơ nuh găh trong vă jang hơ tŏk tơ iung jang hơ dai tơ̆ hơ năp kơnh, 2 păh drơ̆ng nơ̆r pơ trŭt rim anih jang pơ jing khôi luơ̆t 2 teh đak hơ nơ̆ng tơ gŭm păng pơm gơ lang khôi luơ̆t hiôk hloh dơ̆ng ăn tơ drong hơ tŏk tơ klep mŭk drăm, mơ dro sa, tơ mơ̆t jên jang; pơ trŭt tơ ƀơ̆p pơ ma dơ nuh băl đơ̆ng kon pơ lei, mă loi ‘noh jĭ jơ hnơr mơ lôh păng jang hơ dai đơ̆ng rim tơ ring, mă loi ‘noh rim dêh char sơ lam kơ 2 teh đak; jang hơ dai pơ gơ̆r ‘lơ̆ng rim tơ drong jang kơ kuh chơt hơ iă “ Sơ năm jang tơ bôl Việt Nam - Campuchia, Campuchia - Việt Nam 2022” păng tơ băt 55 sơ năm pơ jing tơ drong pơ vei jang tơ bôl đơ̆ng 2 teh đak (24/6/1967-24/6/2022).

Thuem: Tơ blơ̆