VOV4.Bahnar - Lơ̆m jơ năr năm tơ mang tơ̆ Liên bang Nga, kơ sơ̆ ‘năr 1/12, Kơ dră teh đak Nguyễn Xuân Phúc hlôi pơ ma dơ nuh hăm Thủ tướng teh đak Liên bang Nga Mikhail Mishustin tơ̆ Moscow. Kơ dră teh đak Nguyễn Xuân Phúc pơ ma hơ dăh, Đảng, teh đak Việt Nam ling lang chih răk păng băt bơ nê tơ drong tơ gŭm tih tên mă Liên bang Nga hlôi ‘măn ăn kơ Việt Nam lơ̆m tơ drong jang iŏk rơ ngei hơ drĕch hơ drŭng hơ drol sơ̆ kŭm nhen lơ̆m pơ jing păng hơ tŏk tơ iung teh đak hrei ‘nâu.

Kơ dră teh đak Nguyễn Xuân Phúc pơ ma dơ nuh hăm Thủ tướng Liên bang Nga Mikhail Vladimirovich Mishustin

Kơ dră teh đak Nguyễn Xuân Phúc păng Thủ tướng Mishustin hlôi akŏm pơ ma dơ nuh găh tơ drong jang hơ dai Việt Nam – Liên bang Nga lơ̆m rim tơ drong jang, mă loi ‘noh jĭ mŭk drăm; tơ ƀôh đon chhôk hơ iă akhan jang hơ dai mơ dro sa tơ mơ̆t jên jang đơ̆ng 2 teh đak hơ nơ̆ng đei pơ̆ih să; drơ̆ng nơ̆r lơ trong jang hơ tŏk loi dơ̆ng jang hơ dai lơ̆m rim tơ drong jang pơ tho pơ hrăm, khoa hŏk - kơ măy kơ mŏk, joh ayŏ, tơ mang lăng, tơ ƀơ̆p pơ ma dơ nuh băl đơ̆ng kon pơ lei. 2 păh kŭm drơ̆ng nơ̆r vă hơ tŏk loi dơ̆ng jang hơ dai lơ̆m pơm tơ lĕch vaccine kŭm nhen pơ gang hơ met Covid-19.

Thuem: Tơ blơ̆