VOV4.Bahnar - Lơ̆m jơ năr chơt hơ iă kơ Năr lêh teh đak – đĭ đăng kon pơ lei năm pôk rơ̆ih, pơ gê ‘năr 23/5, Kơ dră teh đak Nguyễn Xuân Phúc kŭm hăm hơ kăn sư păng rim bơ ngai tang măt hơ nih tăh kơ phiê̆u 041, hơ nih pôk rơ̆ih kơ sô̆ 9 (thị trấn Củ Chi, apŭng Củ Chi, pơ lei tơm Hồ Chí Minh) hlôi tăh dôm hla kơ phiê̆u pôk bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei jăl jang 2021-2026. Lăp đơ̆ng rŏng kơ tăh kơ phiê̆u, Kơ dră teh đak Nguyễn Xuân Phúc hlôi tơl nơ̆r apĭnh đơ̆ng khŭl chih kơ tơ̆ng ang.

Kơ dră teh đak pơ ma hơ dăh, tơ goăt tơ goăl hơ drĕch hơ drŭng ‘noh jĭ tơ drong tôch kơ tih mă Đảng, ƀok Hồ ‘mêm kơ eng ling lang bơ ngơ̆t truh, pơ gơ̆r, mă loi ‘noh jĭ lơ̆m dôm  năr lêh tĭh nhen Năr lêh teh đak. Mă kăl ‘noh jĭ, pơ đĭ hloi lơ̆m kơ plăh teh đak tơ ƀơ̆p ‘mi kial hơ bŭt, jơ hngơ̆m đon tơ goăt tơ goăl đĭ đăng hơ drĕch hơ drŭng ling lang đei hơ tŏk ‘lơ̆ng. ‘Nâu kŭm jing tơ drong joăt joe kăp gĭt đơ̆ng hơ drĕch hơ drŭng Việt Nam. Jơ hngơ̆m đon ‘noh ư̆h kơ pơ dơh đei hơ tŏk lơ ‘măng păng hơ tŏk pran kơ tang đơ̆ng lơ̆m iung tơ blăh truh tơ drong jang pơ jing păng hơ tŏk tơ iung teh đak.

Thuem: Tơ blơ̆