VOV4.Bahnar - Lơ̆m ‘măng năm hơ pong tơ̆ tĕh đak CHDCND Lào, pơ gê 10/7, Kơ dră tĕh đak Nguyễn Xuân Phúc đei ƀai iung pơ ma tôch gĭt kăl tơ̆ Kuô̆k hô̆i Lào, oei pơ gơ̆r hop akŏm mă 1 Kuô̆k hô̆i jăl IX. Kơ dră tĕh đak tơ ƀôh đon hơ iă mưh jing bơ ngai mă blŭng đơ̆ng tĕh đak đe đei krao akŏm păng iung pơ ma lơ̆m Hnam hôp ‘nao tôch ‘lơ̆ng lơ̆m jơ Hop akŏm Kuô̆k hô̆i jăl IX tĕh đak Cộng hòa Dân chủ Nhân dân Lào.

Ƀai pơ ma đơ̆ng Kơ dră tĕh đak Nguyễn Xuân Phúc tơ roi dơ̆ng rim jơ hnơr ‘lơ̆ng hơ iă lơ̆m tơ dỏng pơ vei kơ 2 tĕh đak. Kơ dră tĕh đak akhan, lơ̆m tơ drong pơ vei chinh trĭ, đei hơ năp tôch gĭt kăl ăn tơ drong jang hơ doi đơ̆ng Kuô̆k hô̆i 2 tĕh đak. Tơ drong tơ gŭm đơ̆ng Kuô̆k hô̆i 2 tĕh đak ‘nŏh jĭ anih gơ nơm tôch kơ jăp găh luơ̆t pơ yoa ăn tơ drong jang hơ doi đei yoa ‘lơ̆ng đơ̆ng Khul kơ dră tĕh đak, Mặt trận Tổ quốc, dôm tơ ring, dôm khul grŭp tơ pôl păng tưk tơ iung tơ drong adrin, gơ̆h hơ gei đơ̆ng anih tĕch mơ dro, kon pơ lei 2 tĕh đak.

Pơ tôch ƀai pơ ma, Kơ dră tĕh đak Nguyễn Xuân Phúc akhan, 2 tĕh đak nhă hơ dai 1 kơ tu đak Mekong, gơn rŏng tơ ‘ngit băl tơ̆ kông Trường Sơn, cham char bri brăh đơ̆ng kră sơ̆ truh dang ei vei kơ jăp ăn 2 tĕh đak, 2 hơ drĕch hơ drung. Kơ dră tĕh đak pơ ma hơ dăh, ‘nŏh jĭ tơ drong guăt băl đơ̆ng yang pơ jing ling lang, rim jơ hnơr, vang tơ gŭm băl jang tŏk pran kơ tang.

Dơ̆ng: Tơ blơ̆