VOV4.Bahnar - Pơ gê 13/7, tơ̆ Anih jang kơ ƀok Kơ dră tĕh đak, Kơ dră tĕh đak Nguyễn Xuân Phúc sơng dôm Bơ ngai tang măt dôm tĕh đak Thái Lan, Chile, Cuba, Liêng bang Nga pơ truh kơ thơ tĕh đak ƀlep ƀât iŏk jang tang măt tơ̆ Việt Nam.

Sơng bơ ngai tang măt ăn Liên bang Nga tơ̆ Việt Nam, ƀok Gennady Bezdetko pơ truh kơ thơ tĕh đak, Kơ dră tĕh đak Nguyễn Xuân Phúc pơ ma hơ dăh, Việt Nam năng kăl tơ drong pơ vei, jang hơ doi gĭt kăl tôm tơ drong hăm Liên bang Nga, ling lang năng Liên bang Nga jĭ 1 lơ̆m dôm tĕh đak jang hơ doi gĭt kăl hlŏh lơ̆m trong jang tơ bôl đơ̆ng kơ dih, hơ pơi ‘mĕh hơ tŏk hlŏh dơ̆ng tơ drong jang hơ doi hăm Nga lơ̆m rim tơ drong.

Kơ dră tĕh đak tơ chĕng ‘lơ̆ng Liên bang Nga lơ̆m dôm sơ năm âu ki hơ nơ̆ng vei kơ jăp tơ drong sơ đơ̆ng chinh trĭ, mŭk drăm, tơ pôl tŏk pran, anih dơ̆ng lơ̆m apŭng plenh tĕh tŏk ‘lơ̆ng mưh sek tơ lang rim tơ drong lơ̆m apŭng plenh tĕh păng tơ̆ tơ ring. Bơ ngai tang măt ăn Liên bang Nga pơ ma hơ dăh Việt Nam ling jang jĭ tĕh đak jang hơ doi gĭt kăl kơ Liên bang Nga ưh lăp tơ̆ tơ ring Đông Nam Á đĕch mă jơ̆p tơ ring Châu Á – Thái Bình Dương hloi. Bơ ngai tang măt pơ ma hơ dăh vă adrin tưk tơ iung hlŏh dơ̆ng rim tơ drong pơ vei jang hơ doi đơ̆ng 2 păh.

Dơ̆ng: Tơ blơ̆