VOV4.Bahnar - Kơ sơ̆ ‘năr 29/6, tơ̆ anih jang kơ ƀok Kơ dră teh đak, Kơ dră teh đak Nguyễn Xuân Phúc sơng yă Victoria Kwakwa, Phŏ kơ dră Anih mong jên apŭng plĕnh teh (WB) vei lăng tơ ring Đông Á păng Thái Bình Dương tŏk bŏk đei ‘măng năm tơ mang păng bơ̆ jang tơ̆ Việt Nam. Chhôk hơ iă tơ ƀơ̆p dơ̆ng yă Victoria Kwakwa, bơ ngai bôl joăt kơ kon pơ lei Việt Nam, Kơ dră teh đak pơ ma hơ dăh, yă Victoria Kwakwa jĭ bơ ngai đei kŏng tôch kơ tih lơ̆m tơ drong pơ trŭt rim tơ drong jang hơ dai đei yua đơ̆ng WB păng Việt Nam. Kơ dră teh đak tơ băt, Việt Nam kŭm hlôi tơ lĕch jang đei yua rim tơ drong jang hơ dai hăm WB; yă Victoria Kwakwa kŭm hmach chơt hơ iă  Việt Nam vei lăng ‘lơ̆ng jĭ COVID-19; pơ ma hơ dăh gô tơ gŭm Việt Nam dôm tơ drong kiơ mă kĕ jang lơ̆m tơ drong răt vaccine pơ yua ăn tơ drong tang găn jĭ COVID-19, vei lăng jơ hngơ̆m jăn kon pơ lei. Tơ roi truh hơ tŏk tơ iung mŭk drăm tơ pôl kơ Việt Nam lơ̆m khei ‘năr đơ̆ng rŏng dơ̆ng, yă Victoria Kwakwa akhan, Việt Nam kăl kơ bơ ngơ̆t truh tơ jur hơ tŏk tơ iung ŭnh điên ngar, hơ tŏk loi dơ̆ng tơ plih pơm tơ lĕch ŭnh hơ yuh rơ goh hloh dơ̆ng.

Thuem: Tơ blơ̆