VOV4.Bahnar - Lơ̆m jơ năr năm tơ mang tơ̆ teh đak Cộng hòa Dân chủ Nhân dân Lào, kơ ‘năr dơ̆ng ‘năr 10/8, tơ̆ anih tơm Viêng Chăn, Kơ dră teh đak Nguyễn Xuân Phúc hlôi sơng pơ ma dơ nuh hăm Phŏ kơ dră teh đak Lào Pany Yathotou păng phŏ kơ dră teh đak Lào Bounthong Chitmany. Tơ̆ jơ pơ ma dơ nuh, Kơ dră teh đak Nguyễn Xuân Phúc pơ ma hơ dăh Đảng,  teh đak păng kon pơ lei Việt Nam ling lang lăng kăl păng ‘măn tơ gŭm hơ drol hloh ăn tơ drong hơ met ming păng hơ tŏk loi dơ̆ng tơ drong pơ vei tơ bôl joăt joe, 1 jơ hngơ̆m đon gĭt kăl păng jang hơ dai tôm tơ drong Việt Nam - Lào. Kơ dră teh đak athei 2 păh hơ nơ̆ng jang hơ dai tơ lĕch jang đei yua rim tơ drong drơ̆ng nơ̆r kơ dră kơ pal hlôi đei kĭ pơ kăp; tŭn pran jang hơ dai lơ̆m đĭ đăng rim tơ drong jang, pơm tơ drong hiôk ăn rim tơ drong jang hơ dai gĭt kăl tơ lĕch jang, kŭm hăm ‘noh jĭ tơ gŭm băl, mă loi ‘noh rim tơ ring tơ ter sơ lam 2 teh đak, vă tang găn jĭ hơ buh păng hơ tŏk tơ iung mŭk drăm - tơ pôl; tŭn pran tơ roi tơ băt, pơ tho pơ hrăm găh tơ drong joet joe pơ vei gĭt kăl Việt - Lào, mă loi ‘noh jĭ ăn jơ hnơr mơ lôh.

Thuem: Tơ blơ̆