VOV4.Bahnar - Hơ nơ̆ng bơ̆ jang tơ̆ New York, Mi, ‘năr 22/9 kiơ̆ jơ New York, Kơ dră tĕh đak Nguyễn Xuân Phúc đei lơ ‘măng tơ ƀâp hăm Kơ dră tơm dôm tĕh đak Mông Cổ, Thụy Sĩ, Áo păng Kơ dră Jơ nŭm châu Âu (EU). Tơ̆ jơ tơ ƀâp hăm Kơ dră tơm Mông Cổ, Kơ dră tĕh đak Nguyễn Xuân Phúc păng Kơ dră tơm Mông Cổ pơ ma hơ dăh ling lang năng kăl tơ drong pơ vei ‘lơ̆ng hơ iă đơ̆ng 2 tĕh đak, tơ gŭm băl lơ̆m tơ drong bơ̆ jang tơ iung pơ jing tĕh đak hrei ‘nâu.

Tơ̆ jơ tơ ƀâp Kơ dră tơm Thụy Sỹ Guy Parmelin, 2 ‘nu kơ dră chĕp kơ̆l athei hơ tŏk tơ drong jang mŭk drăm, tĕch mơ dro; hơ tŏk tơ drong jang hơ doi đơ̆ng 2021-2024 hăm kơ sô̆ jên ODA 80 triu USD mă Thuỵ Sỹ hlôi pơ kăp. 2 ‘nu kơ dră chĕp kơ̆l drơ̆ng nơ̆r athei chă trong pơ gơ̆r pơ ma nuh găh tĕch mơ dro yoa ƀơm kơ nê̆ đơ̆ng jĭ Covid-19, lơ̆m nŏh kăl jăh kĭ pơ kăp FTA đơ̆ng Việt Nam păng Tơ drong tĕch mơ dro hiôk hian Châu Âu (EFTA).

Tơ̆ jơ tơ ƀâp Kơ dră tơm Áo, Kơ dră tĕh đak Nguyễn Xuân Phúc athei Áo pơ jing tơ drong ‘lơ̆ng ăn Việt Nam lơ̆m tơ drong pơ jao kơ măy kơ mŏk pơm tơ mam; set hơ len, tơ gŭm kơ măy kơ mŏk jang pơ gang vă tơ gŭm ăn Việt Nam jăh tang găn păng yak hlôi đơ̆ng tơ drong jĭ hơ buh.

Dơ̆ng: Tơ blơ̆