VOV4.Bahnar - ‘Năr 26/12, tơ̆ Hà Nội pơ gơ̆r hop akŏm Bơ ngai tang măt ăn Luơ̆t sư lơ̆m tĕh đak ‘măng mă III. Truh akŏm păng pơ ma lơ̆m hop akŏm, Kơ dră tĕh đak Nguyễn Xuân Phúc pôk pơ ư, tơ chĕng ‘lơ̆ng khul jang luơ̆t sư lơ̆m tĕh đak đei lơ tơ drong adrin bơ̆ jang, tơ gop vang vei lăng luơ̆t, dôm tơ drong gơ̆h jang đơ̆ng kon pơ lei, tơ drong đei yoa tôch tơ găl trŏ luơ̆t đơ̆ng rim bơ ngai, anih jang, tơ gop ăn tơ drong jang tŏk mŭk drăm, tơ pôl kơ tĕh đak, hơ met ming tư phap, pơ jing, hơ met pơ ‘lơ̆ng Tĕh đak chĕp kơ̆l pơ gơ̆r kiơ̆ luơ̆t XHCN Việt Nam.

Kơ dră tĕh đak Nguyễn Xuân Phúc tơ ƀâp dôm bơ ngai tang măt truh Hop akŏm

Kơ dră tĕh đak ăn tơ băt, Đảng, tĕh đak ling lang tơ rĕk, pơ jing khul luơ̆t sư, tŏk pram găh kơ sô̆ bơ ngai păng tơ drong jang ‘lơ̆ng rơ gei. Ưh đei lai yơ kăl hlŏh dơ̆ng, luơ̆t sư athei jang kơ dih, tơ păt ‘lơ̆ng, năng kăl tơ drong trŏ, pơm kiơ̆ Khôi luơ̆t tơm, luơ̆t tĕh đak, jơ hngâm đon ‘lơ̆ng mưh bơ̆ jang. Luơ̆t sư đei hơ năp jang vei lăng ‘lơ̆ng hlŏh tơ drong đei yoa trŏ luơ̆t đơ̆ng kon pơ lei, khul grŭp, atŭm hăm ‘nŏh vei lăng luơ̆t chĕp kơ̆l pơ gơ̆r kiơ̆ xã hội chủ nghĩa, vei lăng tơ drong đei yoa tôch tơ găl đơ̆ng tĕh đak.

Dơ̆ng: Tơ blơ̆