VOV4.Bahnar - “Dôm kơ đông linh athei jang ‘lơ̆ng hơ drol, pơ tăm ‘long yơ vei rong ‘lơ̆ng ‘long ‘nŏh, adrin tơ chĕng hơ len pơ tăm ‘long pơm tơ̆r tih vă vei lăng cham char đunh đai. Hơ nơ̆ng hơ tŏk hơ năp jang đơ̆ng dôm khul jang mŭk drăm, vei sơ đơ̆ng tĕh đak păng dôm anih jang đei tĕh xă vă pơ tăm ‘long, atŏk tơ iung bri”.

‘Nâu jĭ athei đơ̆ng Kơ dră tĕh đak Nguyễn Xuân Phúc hăm dôm kơ đông linh lơ̆m Lêh pơ tăm ‘long rim jơ hnơr ƀlŏk hơ dơ̆r kơ Ƀok Hô yoa Anih tơm vei lăng khul linh tĕh đak pơ gơ̆r pơ gê ‘năr 13/4 tơ̆ anih gru groa K9-Đá chông, Ba Vì, Hà Nội.

Kiơ̆ nơ̆r tơ roi đơ̆ng Anih tơm vei lăng khul linh, đơ̆ng 2015-2020, đĭ đăng khul linh pơ tăm đei vă jê̆ 11 triu tơm ‘long lơ kơ loăi. Đơ̆ng blŭng sơ năm trhh dang ei lơ kơ dông linh pơ tăm đei 1,5 triu tơm ‘long, 737 ha bri, tŏk 2,7 ‘măng pơ têng hăm khei âu sơ năm sơ̆. Đĭ đăng khul linh adrin jang kĕh nơ̆r hơ găt pơ tăm 3,3 triu tơm ‘long păng 1.785 ha bri ‘lơ̆m sơ năm ‘nâu. 

Kơ dră tĕh đak athei Anih tơm vei lăng khul linh hơ tŏk tơ drong roi tơ băt ăn kon pơ lei, kăn ƀô̆, linh găh tơ drong kăl đơ̆ng pơ tăm ‘long, vei lăng bri, atŭm hăm ‘nŏh tơ lĕch jang mă ‘lơ̆ng tơ drong jang pơ tăm 1 ti tơm ‘long-yoa 1 tĕh đak Việt Nam rơ gŏh ‘lơ̆ng hăm lơ trong jang mă rơ đăh păng đei yoa.

Dơ̆ng: Tơ blơ̆