VOV4.Bahnar - ‘Năr 9/1, Khul chih văn Việt Nam pơm lêh tơ lĕch tơ drong krao hơ vơn pơ chĕh văn hŏk găh đe hơ iŏh. Pơ ma lơ̆m jơ pơm lêh, Kơ dră tĕh đak Nguyễn Xuân Phúc tơ chĕng ‘lơ̆ng Khul chih văn Việt Nam pơ gơ̆r krao hơ vơn chih pơ chĕh văn hŏk găh đe hơ iŏh păng akhan, ‘nâu jĭ tơ drong tôch gĭt kăl. Yoa văn hŏk jĭ tơ drong tơm vă vei rong jơ hngâm đon hue lăng truh tơ drong ‘lơ̆ng hơ iă, băt ‘mêm băl; atŭm hăm ‘nŏh tưk tơ iung đon adrin đơ̆ng kon bơ ngai, mă loi jĭ hăm jơ hnơr mơ lôh, druh dăm, hơ iŏh iĕ.

Kơ dră tĕh đak iung pơ ma lơ̆m jơ pơm lêh

Kơ dră chĕp kơ̆l khul chih văn Việt Nam Nguyễn Quang Thiều ăn tơ băt, Tơ drong krao hơ vơn chih pơ chĕh văn găh đe hơ iŏh pơ gơ̆r lơ̆m 5 sơ năm (đơ̆ng dang ei truh khei 5/2025) hăm ƀar kơ loăi chih pơ chĕh ‘nŏh chih thơ păng chih văn. Bơ ngai thi ‘nŏh jĭ đĭ đăng kon pơ lei Việt Nam lơ̆m tĕh đak păng tơ̆ tĕh đak đe. Anih pơ gơ̆r pơ lung đe druh dăm, đe hơ iŏh vang chih pơ chĕh hai. Lêh pơ jao hơ păh tơ mam đơt 1 vă pơ gơ̆r ƀât Têt trung thu sơ năm 2023.  

Dơ̆ng: Tơ blơ̆