VOV4.Bahnar - Đơ̆ng rŏng jơ nei ‘lơ̆ng hơ iă đơ̆ng ‘măng năm tơ mang tơ̆ Cuba, kơ sơ̆ ‘năr 20/9 kiơ̆ jơ tơ ring, vă khan pơ gê hrôih hei kiơ̆ jơ Việt Nam, Kơ dră teh đak Nguyễn Xuân Phúc năm tơ̆ teh đak Mi, vang akŏm ‘măng pơ ma dơ nuh atŭm kơ dră kơ pal jăl 76 Hop akŏm jơ nŭm Liên hợp quốc păng jang kiơ̆ 1 ,2 tơ drong jang 2 pang tơ̆ Mi. Tơ drong jang gĭt kăl âu vă tơ lĕch trong jang tơ bôl Hop akŏm Đảng lơ̆m teh đak ‘măng mă 13 hlôi tơ lĕch ăn; tŭn pran păng hơ tŏk tơ drong jang tơ bôl lơ pang đơ̆ng Việt Nam truh sơ năm 2030; tơ ƀôh hơ năp jang, anih dơ̆ng ‘noh jĭ teh đak jang lơ̆m khŭl đei jang tơ năp păng tơ gop ‘lơ̆ng lơ̆m rim tơ drong jang đơ̆ng Liên hợp quốc păng tơ pôl apŭng plĕnh teh. Hăm tơ drong vang akŏm kơ tă đơ̆ng hloh 100 ‘nu kơ dră chĕp kơ̆l gĭt kăl, Hop akŏm jơ nŭm Liên hợp quốc jăl 76 ‘noh jĭ tơ drong hiôk vă pơ gơ̆r rim ‘măng tơ ƀơ̆p pơ ma dơ nuh 2 pang đơ̆ng kơ dră chĕp kơ̆l rim teh đak đơ̆ng rŏng đunh khei ‘năr ưh kơ gơ̆h tơ ƀơ̆p kơ tă yua đơ̆ng jĭ hơ buh COVID-19. Kơ dră teh đak Nguyễn Xuân Phúc oei đei lơ tơ drong jang 2 pang tơ̆ Liên hợp quốc păng Mi, vă hơ tŏk loi dơ̆ng jang hơ dai đơ̆ng bơ̆n hăm khŭl kơ dră rim teh đak păng khŭl kơ dră chĕp kơ̆l ‘nao kơ teh đak Mi; pơ trŭt tơ drong pơ vei jang hơ dai tôm tơ drong tŏk bŏk hơ tŏk tơ iung ‘lơ̆ng hơ iă; lăp hăm tơ drong tơm, đei yua atŭm kơ 2 teh đak Việt Nam – Mi.

Thuem: Tơ blơ̆