VOV4.Bahnar - Gơ măng ‘năr  28/12, tơ̆ pơ lei tơm Tam Kỳ, Kơ dră teh đak Nguyễn Xuân Phúc vang pơm Lêh tơ băt 550 sơ năm hơ năn krao Quảng Nam (1471 – 2021). Pơ ma tơ̆ jơ pơm lêh, kơ dră teh đak Nguyễn Xuân Phúc tơ băt, đunh kơ âu 550 sơ năm, Pơ tao Lê Thánh Tôn hlôi chă hơ năn ăn tơ ring teh Quảng Nam ‘noh 3 tơ ring kơ drơ̆m: Thăng Hoa, Tư Nghĩa păng Hoài Nhơn. Yua thoi noh tơ drong jang gĭt kăl năr ‘nâu ưh khan lăp đei tơ drong ‘lơ̆ng hăm Quảng Nam mă oei hăm pơ đĭ hloi Đà Nẵng, Quảng Ngãi, Bình Định păng pơ đĭ tơ ring tŏk bŏk. Quảng Nam, hơ năn krao ƀĕnh tơ drong ‘lơ̆ng tơ ƀôh tơ drong trĕng lăng hơ tăih ƀôh xă găh teh đak Việt bơ̆n kŭm nhen hơ pơi ‘meh hơ drĕch hơ drŭng pran kơ tang. Hơ drol ‘noh, lơ̆m kơ sơ̆ ‘năr 28/12, Kơ dră teh đak Nguyễn Xuân Phúc tơ ƀơ̆p muh măt rim bơ ngai sơ̆ pơm chĕp kơ̆l anih jang đảng dêh char đơ̆ng sơ năm 1997 truh dang ei. Tơ roi 1,2 long nol hăm Quảng Nam hrei ‘nâu nhen tơ drong jang mŭk drăm oei iĕ, iŏk yua jô̆ păh lăp kơ̆l bơ ngai tŏ sĕt hloh pơ têng hăm jô̆ păh lăp atŭm lơ̆m teh đak, trong nơ năm oei mơ mat tat; kơ sô̆ ŭnh hnam dơ nuh hin oei lơ hăm 4,25%, tơ drong ‘lơ̆ng găh bơ ngai jang oei tam mă lơ, Kơ dră teh đak Nguyễn Xuân Phúc athei: Kăl đei 1 jơ hngơ̆m đon hơ drin, 1 tơ drong hơ pơi ‘meh đơ̆ng bơ ngai  Quảng Nam tơ̆ hơ năp kơnh.

Thuem: Tơ blơ̆