VOV4.Bahnar - Oei lơ̆m rim tơ drong jang tơ băt 60 sơ năm năr Ƀok Hồ vih tơ mang tơ̆ pơ lei ‘măng mă 2 (8/12/1961-8/12/2021), ‘năr 12/12, tơ̆ Anih gru groa Kim Liên, xăh Kim Liên, apŭng Nam Đàn, dêh char Nghệ An pơ gơ̆r Lêh tơ băt 60 sơ năm Ƀôk Hồ vih tơ mang tơ̆ pơ lei ‘măng mă 2 păng et hơ tŏk Hnam ƀlŏk hơ dơ̆r kơ ƀok Kơ dră Hồ Chí Minh lơ̆m cham Hơ nih gru groa. Pơ ma tơ̆ jơ pơm lêh, Kơ dră teh đak Nguyễn Xuân Phúc tơ băt, prăt jơ hnơr arih jang kach mang, Ƀok hlôi yua kơ lăng kăl teh đak mă hơ chăng lê̆ pơ lei pơ la.

Hơ tăih kơ pơ lei đơ̆ng sơ năm 1906 ding truh jing bơ ngai chĕp kơ̆l Đảng păng Teh đak, Ƀok Hồ lăp vih tơ mang tơ̆ pơ lei đei 2 ‘măng, mă lei Ƀok oei gơ̆ih tôm tơ drong ƀlŏk, ‘mêm kiơ̆ dôm hlak kơ thơ, ƀai chih gơ̆ih ăn pơ lei pơ la, dôm ‘măng kơ tă pơ ma dơ nuh hăm kon pơ lei, kang ƀô̆, đảng viên dêh char Nghệ An. Kơ dră teh đak pơ ma hơ dăh, Đảng, Teh đak păng kon pơ lei bơ̆n kŭm lang lang chih răk dôm tơ drong jang tih tên đơ̆ng rim mĕ ƀă yă ƀok, đơ̆ng ŭnh hnam păng rim mih ma duch nă,‘nhŏng oh păh ƀă , păh mĕ kơ Ƀok hlôi rơ neh, rong me, pơ tho pơ hrăm bơ ngai kon pran kơ tang kơ hơ drĕch hơ drŭng Việt Nam - Kơ dră Hồ Chí Minh ‘mêm kơ eng.  

Thuem: Tơ blơ̆