VOV4.Bahnar - Pơ gê 26/8, tơ̆ Hà Nội, Anih pơ gơ̆r jang hơ met ming Tư phap Trung ương hop akŏm mă 13 hăm tơ drong pơ gơ̆r đơ̆ng Kơ dră tĕh đak Nguyễn Xuân Phúc, Kơ dră Anih pơ gơ̆r jang vă pơ ma nuh, tơ gop nơ̆r găh dôm tơ drong iŏk đei mưh bơ̆ jang tơ drong jang: “Tơ plih ‘nao păng hơ met pơ kĕh trong jang kon pơ lei vang sek tơ lang tơ̆ Anih sek tơ lang, pơm lăp hăm tơ drong ‘mĕh vă hơ met ming tư phap” păng "Roi tơ băt nơ̆r tơ gop găh trong tơ lĕch tơ drong hơ găt pơ gơ̆r sek tơ lang trư̆k tuyê̆n tơ̆ anih sek tơ lang".

‘Nâu jĭ 2 tơ drong yoa Khul chĕp kơ̆l Đảng kơ Anih tơm sek tơ lang kon pơ lei pơ gơ̆r iŏk nơ̆r tơ gop đơ̆ng Anih pơ gơ̆r hơ met ming tư phap Trung ương adrol kơ gơih ăn dôm anih jang kơ pal set hơ len, tơ chơ̆t, kiơ̆ trong bơ̆ jang hơ met ming tư phap tơ̆ hơ năp kơnh. Đơ̆ng rŏng kơ mơ̆ng nơ̆r pơ ma nuh đơ̆ng dôm bơ ngai jang lơ̆m Anih pơ gơ̆r, Kơ dră  tĕh đak Nguyễn Xuân Phúc pơ ma hơ dăh athei hơ nơ̆ng jang kiơ̆ tơ drong tơ plih ‘nao đơ̆ng tơ drong Tơ chơ̆t lơ̆m hop akŏm mă XIII hơ drol hlŏh ‘nŏh jĭ rim anih jang tư pháp. Khul thư ký chih akŏm mă tôm nơ̆r tơ gop, pơ ma nuh vă jăh chih tơ roi pơ ‘lơ̆ng, blŭng a ‘nŏh jĭ Tơ drong hơ găt pơ gơ̆r sek tơ lang trư̆k tuyê̆n tơ̆ Anih sek tơ lang; kiơ̆ đơ̆ng noh pơ jing tơ drong ‘lơ̆ng ăn tơ drong sek tơ lang trư̆k tuyê̆n jăh tơ mât yoa tơ̆ yăn âu.

Dơ̆ng: Tơ blơ̆