VOV4.Bahnar - Pơ gê 7/12, tơ̆ Anih jang kơ ƀok Kơ dră, Kơ dră tĕh đak bơ̆n Nguyễn Xuân Phúc, Kơ dră Jơ nŭm vei lăng sơ đơ̆ng tĕh đak pơ gơ̆r hop akŏm mă mônh Jơ nŭm vei lăng sơ đơ̆ng tĕh đak jăl jang đơ̆ng 2021 - 2026. Tơ̆ jơ hop akŏm, Jơ nŭm pơ ma nuh, tơ gop nơ̆r găh tơ drong jang hơ doi đơ̆ng dôm khul linh, Công an păng dôm anih tơm, anih jang kơ pal, tơ ring tơ rang lơ̆m tơ drong tang găn jĭ COVID-19; hơ tŏk tơ drong pơ truh linh vang bơ̆ jang lơ̆m khul linh vei lăng rơ ngei kơ Liên hợp quốc; tơ drong vei lăng sơ đơ̆ng mang păng tơ blăh tơ̆ rơ vơ̆ng plenh lơ̆m chăl ‘nao hrei ‘nâu.

Găh tơ drong jang sơ năm 2022, Kơ dră tĕh đak, Kơ dră Jơ nŭm vei lăng sơ đơ̆ng tĕh đak pơ ma hơ dăh athei băt hơ dăh rim tơ drong, kơ chăng pơ jing trong jang đunh đai, tơ lĕch trong jang mă lăp hăm rim tơ drong tơ̆ tơ ring păng lơ̆m apŭng plenh tĕh, Kơ dră tĕh đak athei dôm bơ ngai jang, anih jang lơ̆m Jơ nŭm hơ tŏk hơ năp jang vei lăng sơ đơ̆ng tĕh đak. Mă loi ‘nŏh kơ chăng tang găn, tơ jră hăm dôm tơ drong nol ‘nao kơ plăh dang ei păng đunh đai. Năm hơ doi hăm ‘nŏh jĭ hơ tŏk tơ drong jang hơ doi mă kơ jăp găh khul linh, vei sơ đơ̆ng păng jang tơ bôl, tưk tơ iung tơ drong jang tơ bôl găh khul linh vei lăng sơ đơ̆ng tĕh đak đơ̆ng hrôih, đơ̆ng hơ tăih.

Dơ̆ng: Tơ blơ̆