VOV4.Bahnar - Kơ sơ̆ ‘năr 8/10, tơ̆ Hà Nội, Kơ dră teh đak Nguyễn Xuân Phúc vang pơm lêh sơng iŏk mê đai Jang pran kơ tang ăn Khŭl hơ druh tơ dăm dŏng teh đak Thành Hoàng Diệu; tơ drong jang pôk pơ ư bơ ngai ‘lơ̆ng, tơ drong ‘lơ̆ng păng chơt hơ iă hơ năn kon pơ lei anih tơm hơ gei sơ năm 2021 kơ pơ lei tơm Hà Nội. Tơ drong jang đei pơ gơ̆r kiơ̆ pơ đĭ hloi kơ tă păng trực tuyến hăm hloh 80 hơ nih pơ dăh ti vi lơ̆m pơ lei tơm Hà Nội. Tang măt kơ dră chĕp kơ̆l Đảng, Teh đak, kơ dră teh đak Nguyễn Xuân Phúc hlôi pơ jao mê đai jang pran kơ tang ăn kơ Khŭl hơ druh tơ dăm dŏng teh đak Thành Hoàng Diệu. Lơ̆m jơ hnơr arih kơ pơ lei tơm Hà Nội, tơ drong jang jơ nei đơ̆ng Khŭl hơ druh tơ dăm dŏng teh đak Thành Hoàng Diệu ling lang đei chih răk. Pơ tăl joăt joe đơ̆ng rim khŭl hơ druh tơ dăm sơ̆, lơ̆m dôm sơ năm âu ki, sơ năm mơ lôh Anih tơm hlôi iung jang lơ̆m rim tơ drong mặt trận, vang tơ gop lơ̆m pơ jing Anih tơm ‘noh jĭ pơ lei tơm hơ gei, yua kơ rơ ngei, rơ bâu sơ năm gơh hơ gei ‘lơ̆ng hơ iă.

Thuem: Tơ blơ̆