VOV4.Bahnar - ‘Năr 21/10, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc pơ jao tơ drong tơ chơ̆t pôm pơm Bơ ngai tang măt jăl jang đơ̆ng 2021 – 2024 tơ̆ tơ ring châu Âu păng Trung Á ăn 8 ‘nu Bơ ngai tang măt.

Kơ dră tĕh đak Nguyễn Xuân Phúc pơ ma lơ̆m jơ pơm lêh pơ jao tơ drong tơ chơ̆t

Lơ̆m jơ sơng, dơ̆ng tang ăn dôm bơ ngai tang măt, dôm bơ ngai ‘nao đei pôk tơ ƀôh đon hơ iă tôch dêh mưh iŏk tơ drong jang đơ̆ng Đảng, tĕh đak păng kon pơ lei pơ jao, atŭm hăm ‘nŏh pơ ma hơ dăh vă adrin tôch ai, jang hơ doi kơ jăp hăm dôm anih jang lơ̆m tĕh đak păng tơ̆ tĕh đak đe, bơ̆ jang ‘lơ̆ng trong jang tơ bôl đơ̆ng Hop akŏm Đảng lơ̆m tĕh đak ‘măng mă XIII.

Tang măt ăn kơ dră chĕp kơ̆l Đảng, tĕh đak, Kơ dră tĕh đak Nguyễn Xuân Phúc hơ iă hăm dôm bơ ngai tang măt đei Đảng, tĕh đak lui pơ jao hơ năp jang trăp trĭn tơ̆ dôm tĕh đak Châu Âu. Kơ dră tĕh đak pơ ma hơ dăh, ‘nâu jĭ tơ drong hơ iă hai kŭm jing hơ năp jang tih mă Đảng, tĕh đak păng kon pơ lei pơ jao ăn dôm bơ ngai tang măt hai. Tơ̆ ‘măng pôk bơ ngai jang tang măt mă 2 đơ̆ng rŏng Hop akŏm Đảng lơ̆m tĕh đak ‘măng mă XIII, Kơ dră tĕh đak pơ ma dơ̆ng trong jang tơ bôl đơ̆ng Việt Nam đơ̆ng rŏng Hop akŏm kŭm nhen dôm tơ drong tơm vă năm truh klĕp sơ năm 2045, Việt Nam jing tĕh đak pơ drŏng, đei iŏk yoa lơ.

Dơ̆ng: Tơ blơ̆