VOV4.Bahnar - Ƀlep ƀơ̆t tơ băt 131 sơ năm năr rơ neh kơ ƀok Kơ dră Hồ Chí Minh, 110 sơ năm ƀok Hồ lĕch năm chă trong dŏng teh đak (05/6/1911 - 05/6/2021), pơ ge ‘năr 20/5, tơ̆ 1,2 anih gru groa jơ hnơr arih tơ̆ apŭng Hóc Môn, pơ lei tơm Hồ Chí Minh, Kơ dră teh đak Nguyễn Xuân Phúc pơ yơ̆r pơ kao, soh nhang ƀlŏk hơ dơ̆r kơ ƀok Kơ dră Hồ Chí Minh; pơ yơ̆r pơ kao, soh nhang ƀlŏk hơ dơ̆r kơ rim linh nŭih mơng lôch dŏng teh đak, lơ̆m noh đei ƀok Tổng Bí thư Nguyễn Văn Cừ, Hà Huy Tập. Apŭng Hóc Môn đei lơ̆m teh đak băt truh hăm tơ drong iung tơ blăh 18 thôn Vườn Trầu lơ̆m sơ năm 1885 păng Hóc Môn ‘noh jĭ tơ ring đei Trung ương Đảng rơ̆ih pơm kăn kư̆ ôn vă pơ̆ih lơ hop akŏm gĭt kăl pơ gơ̆r tơ drong jang kach mang lơ̆m teh đak chăl sơ năm 1936-1939. Tơ̆ Hơ nih soi tơ băt Ngã Ba Giồng lơ̆m cham Anih gru groa jơ hnơr arih kơ teh đak Ngã Ba Giồng, Kơ dră teh đak Nguyễn Xuân Phúc păng khŭl soh hnang, pơ yơ̆r pơ kao, kŭp kơ̆l tơ̆ hơ năp rup ƀok Kơ dră Hồ Chí Minh, kơ dră chĕp kơ̆l nŭih mơng kơ hơ drĕch hơ drŭng Việt Nam. Kŭm lơ̆m pơ ge ‘năr 20/5, tơ̆ xăh Tân Thới Thượng, apŭng Hóc Môn, Kơ dră teh đak Nguyễn Xuân Phúc hlôi năm tơ mang, asong tơ mam ăn kơ 1,2 ŭnh hnam teh đak tơ gŭm.

Thuem: Tơ blơ̆