VOV4.Bahnar - Kơ sơ̆ ‘năr 03/6/2021, tơ̆ Anih jang kơ ƀok Kơ dră, Kơ dră tĕh đak Nguyễn Xuân Phúc sơng Bơ ngai tang măt ăn Nhật Bản tơ̆ Việt Nam Yamada Takio truh tơ ƀâp păng pơ ma nuh găh găh tơ drong Pơ vei jang hơ doi gĭt kăl Việt Nam - Nhật Bản.

Kơ dră tĕh đak Nguyễn Xuân Phúc tơ ƀôh đon hơ iă ăn Tơ drong pơ vei jang hơ doi gĭt kăl Việt Nam - Nhật Bản khei ‘năr âu ki tŏk tôch ‘lơ̆ng lơ̆m rim tơ drong; athei Bơ ngai tang măt Nhật Bản hơ nơ̆ng hơ tŏk tơ drong tơ ƀâp ăn kuan tih păng rim tơ ring đơ̆ng 2 tĕh đak; jang hơ doi, tơ gŭm băl lơ̆m tơ drong tang găn jĭ Covid-19; hơ tŏk tơ drong jang hơ doi mŭk drăm, pơ trŭt, tưk tơ iung anih tĕch mơ dro Nhật Bản truh tơ mât jên jang xa, tĕch mơ dro tơ̆ Việt Nam.

Bơ nê kơ ƀok Kơ dră tĕh đak Nguyễn Xuân Phúc ‘măn jơ sơng, Bơ ngai tang măt Yamada Takio tơ ƀôh đon hơ pơi ‘mĕh, Kơ dră tĕh đak năm hơ pong tơ̆ Nhật Bản lơ̆m khei ‘năr sư oei bơ̆ jang tơ̆ Việt Nam. Bơ ngai tang măt pơ ma hơ dăh trong jang ưh đei tơ plih đơ̆ng Khul kơ dră tĕh đak Nhật Bản năng kăl tơ drong pơ vei hăm Việt Nam; hơ nơ̆ng tơ gŭm ăn Việt Nam tang găn jĭ COVID-19; hơ tŏk tơ dỏng jang hơ doi găh pơm trong, man anih jang, jang kơ măy sô̆, vei lăng cham char; athei anih tĕch mơ dro Nhật Bản truh tơ mât jên jang tơ̆ Việt Nam…

Dơ̆ng: Tơ blơ̆