VOV4.Bahnar - Pơ gê 13/5, tơ̆ Dinh Thống Nhất, plt Hồ Chí Minh, Kơ dră tĕh đak Nguyễn Xuân Phúc sơng Khul tang măt ăn Khul kơ dră pơ gơ̆r Trung ương lui phât Việt Nam ƀlep ƀât lêh tih Phật đản 2021-Phật lịch 2565 yoa ƀok chuơ Thích Thiện Nhơn, Kơ dră chĕp kơ̆l Khul pơ gơ̆r lui phât vang năm hăm dôm bơ ngai jang lơ̆m Khul pơ gơ̆r lui phât Việt Nam.

Kơ dră tĕh đak Nguyễn Xuân Phúc sơng Khul tang măt lui phât Việt Nam

Sơ năm ‘nâu, tăng, ni, bơ ngai lui phât Việt Nam vă pơ gơ̆r krao khan hơ iă kơ lêh tih Phật Đản 2021 kiơ̆ trong ngôi hơ tăih băl vă pơm ‘lơ̆ng ăn tơ drong tang găn jĭ hai, hơ nhăk ba kơ jă kăp gĭt ăn jơ hngâm đon tơ pôl hai, pơ jing jơ hngâm đon sơ đơ̆ng, adrin hơ met pơ ‘lơ̆ng dôm tơ drong mơ mat tat lơ̆m tơ drong arih xa păng akŏm jơ hngâm vang jang atŏk tơ iung tĕh đak.

Kơ dră tĕh đak, lui păng hơ pơi ‘mĕh Khul lui Phât Việt Nam hơ nơ̆ng tơ ƀôh hơ năp jang, bưng ai kơ dih lơ̆m tơ drong tơ guăt đĭ đăng hơ drĕch hơ drung, tơ guăt tơ drong lui khop; tưk tơ iung jơ hngâm pran đơ̆ng tơ drong lui, đơ̆ng jŏh ayŏ kơ dŏ xoang vă jang atŏk tơ iung tĕh đak.

Dơ̆ng: Tơ blơ̆