VOV4.Bahnar - Kơ sơ̆ 15/7, tơ̆ Anih jang kơ ƀok Kơ dră, Kơ dră tĕh đak Nguyễn Xuân Phúc đei jơ tơ ƀâp Kơ dră vei lăng Khul bơ ngai Hàn Quốc tơ̆ Việt Nam păng 1,2 grŭp jang tih kơ Hàn Quốc. Lơ̆m jơ tơ ƀâp, tang măt ăn tĕh đak, ƀok Kơ dră Nguyễn Xuân Phúc hôn bơ nê dôm anih tĕch mơ dro Hàn Quốc tơ̆ Việt Nam đei trong jang ưh ăn jĭ COVID -19 tơ pŏh xă lơ̆m dôm anih jang kơ măy, anih tĕch mơ dro; vei lăng ‘lơ̆ng tơ drong jang xa, tĕch mơ dro.

Mă loi dôm anih jang kơ Hàn Quốc vang tơ gŭm lơ triu đô la ăn tơ drong tang găn jĭ COVID – 19 păng tơ gŭm ăn Anih mong jên vaccine tang găn jĭ COVID – 19 tơ̆ Việt Nam. Kơ dră tĕh đak Nguyễn Xuân Phúc pơ ma hơ dăh, Việt Nam pơ kăp vă pơ jing tơ drong hiôk hian ăn anih tĕch mơ dro jang tŏk, lơ̆m nŏh đei lơ anih tĕch mơ dro Hàn Quốc vă dôm bơ ngai tơ mât jên jang hơ nơ̆ng jang tŏk lơ̆m anih tĕch mơ dro, ưh lăp tơ̆ Châu Á đĕch mă jơ̆p lơ̆m plei tĕh hloi.

Dơ̆ng: Tơ blơ̆