VOV4.Bahnar - Hơ nơ̆ng rim tơ drong jang tơ̆ New York, Mi, Kơ dră teh đak hlôi đei lơ jơ tơ ƀơ̆p, pơ ma dơ nuh hăm hăm kơ dră teh đak, kơ dră chĕp kơ̆l 1,2 teh đak, tơ ƀơ̆p trực tuyến Kơ dră chĕp kơ̆l pơ gơ̆r Thượng viện Mi. Kơ dră teh đak Nguyễn Xuân Phúc kŭm hlôi đei jơ pơ ma dơ nuh hăm bơ ngai tang măt rim teh đak ‘noh Bơ ngai jang kơ Jơ nŭm vei lăng sơ đơ̆ng Liên hợp quốc. Pơ ma dơ nuh hăm bơ ngai tang măt kơ khŭl Liên bang Nga, Kơ dră teh đak Nguyễn Xuân Phúc pơ ma hơ dăh, Nga jĭ 1 lơ̆m dôm teh đak jang hơ dai gĭt kăl kơ Việt Nam. Truh âu kơnh, kơ dră kơ pal 2 teh đak gô jăh đei dôm ‘măng pơ ma dơ nuh kơ tă vă hơ tŏk loi dơ̆ng tơ drong pơ vei jang hơ dai đơ̆ng Việt Nam păng Liên bang Nga. Lơ̆m ‘măng pơ ma dơ nuh hăm Kơ dră tơm jang tơ bôl Mi Antony Blinken, kơ dră teh đak Nguyễn Xuân Phúc bơ nê kơ Mi tŏk bŏk jing 1 lơ̆m dôm teh đak tơ gŭm vắc xin bơ̆ng jĭ Covid-19 tih hloh ăn rim teh đak kiơ̆ trong jang COVAX. Hơ drol ‘noh, kơ dră teh đak Nguyễn Xuân Phúc hlôi đei jơ ƀơ̆p hăm hơ kăn ƀok pơ tao Hà Lan Maxima, bơ ngai tang măt gĭt kăl kơ Tổng Thư ký Liên hợp quốc găh jên hu; sơng Kơ dră dơ nơm Anih mong jên hu apŭng plĕnh teh (IMF) Kristalina Georgieva, păng lơ anih jang mơ dro sa tih hloh tơ̆ Mi.

Thuem: Tơ blơ̆