VOV4.Bahnar - Kơ sơ̆ 6/1, tơ̆ anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc pơ jao tơ drong tơ chơ̆t hơ tŏk grat đơ̆ng Trung tướng jing Thượng tướng hăm dôm Phŏ kơ dră tơm vei lăng Công an ‘nŏh ƀok Trần Quốc Tỏ păng Lương Tam Quang.

Pơ ma lơ̆m jơ pơm lêh pơ jao tơ drong tơ chơ̆t, tang măt ăn kơ dră chĕp kơ̆l Đảng, tĕh đak, hơ iă hăm 2 ‘nu Phŏ kơ dră tơm vei lăng Công an đei hơ tŏk grat đơ̆ng Trung tướng tŏk jing Thượng Tướng, Kơ dră  tĕh đak Nguyễn Xuân Phúc akhan, ƀok Trần Quốc Tỏ păng ƀok Lương Tam Quang jĭ kăn ƀô̆ đei đon tơ chĕng kơ jăp ‘lơ̆ng, đei jơ hngâm đon ‘lơ̆ng; đei hŏk pơ hrăm truh um, hlôh vao păng jang gơ̆h hơ gei; đei pơ tâp pơ hrăm, pơ long nol păng jang tŏk đơ̆ng tơ drong jang tơ̆ yăn âu, vang bơ̆ jang iung tơ blăh, gơ̆h hơ gei găh tơ drong chĕp kơ̆l pơ gơ̆r, vei lăng anih jang, tơ ring tơ rang.

Kơ dră tĕh đak Nguyễn Xuân Phúc lui păng hơ pơi ‘mĕh đe ƀok hơ nơ̆ng kŭm hăm Anih jang Đảng Công an TƯ, kơ dră chĕp kơ̆l Anih tơm vei lăng Công an vei kơ jăp jơ hngâm đon kăch mang ‘lơ̆ng hơ iă, hơ nơ̆ng vei lăng păng tơ iung jơ hngâm đon ‘lơ̆ng păng um rup đơ̆ng bơ ngai Công an kon pơ lei “yoa tĕh đak hiơt hơ kâu, yoa kon pơ lei mă pơ vih pơ văn” lơ̆m chăl ‘nao.

Dơ̆ng: Tơ blơ̆