VOV4.Bahnar - Kơ dră tĕh đak Nguyễn Xuân Phúc ‘nao đei kơ thơ pôk pơ ư Tổng Liên đoàn Lao động Việt Nam găh tơ drong tơ lĕch, bơ̆ jang đei jơ nei ‘lơ̆ng tơ drong jang “75 rơ bâu tơ drong pơ chĕh, yak hlŏh mơ mat tat, jang tŏk” ƀlep ƀât tơ băt 75 sơ năm Năr apŭng plenh tĕh kơ bơ ngai jang tơ̆ Việt Nam.

Tơ drong jang đei tơ lĕch hăm đe đoàn viên công đoàn, công nhân, bơ ngai jang kơ tĕh đak, bơ ngai jang hmă tơ̆ dôm anih jang, anih tĕch mơ dro, khul grŭp lơ̆m tĕh đak. Kơ dră tĕh đak akhan, “75 rơ bâu tơ drong pơ chĕh, yak hlŏh mơ mat tat, jang tŏk” ‘nŏh jĭ tơ drong jang tôch đei yoa, yoa tơ drong jang xa jĭ tơ drong tơm pơm tơ lĕch tơ mam păng tơ drong hơ nŭk hơ noa kơ tĕh đak.

Tơ drong jang pơm tơ iung jơ hngâm jang, đon pơ chĕh rơ gei ‘nao lơ̆m anih jang, anih tĕch mơ dro: rim bơ ngai jang vang bơ̆ jang tôch tơ năp, vang tơ gop ăn tơ drong jang tŏk tơ̆ anih jang kơ dih. Kơ dră tĕh đak tơ ƀôh đon lui păng hmach thơ thou ăn Tổng Liên đoàn Lao động Việt Nam hơ nơ̆ng tưk tơ iung đei tơ drong jang “75 rơ bâu tơ drong pơ chĕh, yak hlŏh mơ mat tat, jang tŏk”, hơ nơ̆ng đei lơ tơ drong jang kăp gĭt păng pơih xă tơ̆ jơ̆p tơ ring, vang tơ iung đon lui păng hơ pơi ‘mĕh pơ jing 1 tĕh đak Việt Nam pran kơ tang, hiôk chơt.

Dơ̆ng: Tơ blơ̆