VOV4.Bahnar - Pơ gê ‘năr 2/11, tơ̆ Ninh Bình, Kơ dră teh đak Nguyễn Xuân Phúc tơ mang tơ̆ 1,2 tơ drong jang hơp tak xăh pơm tơ lĕch păng tĕch mơ dro bơ̆ jang đei yua, pơm lơ tơ drong jang ăn bơ ngai jang tơ̆ tơ ring, ‘noh jĭ hơp tak xăh pơm tơ lĕch, tĕch mơ dro bơ̆n pơ nhan, bô̆i, klĭnh Bồ Bát, apŭng Yên Mô păng hơp tak xăh Sinh Dược apŭng Gia Viễn. Ƀlep ƀơ̆t ‘măng âu, Kơ dră teh đak Nguyễn Xuân Phúc athei kơ dră chĕp kơ̆l dêh char Ninh Bình, dôm apŭng Gia Viễn, Yên Mô, Jơ nŭm Hơp tak xăh Việt Nam păng dêh char Ninh Bình, pơm tơ drong hiôk ăn rim hơp tak xăh hơ tŏk tơ iung, pơm lơ tơ drong jang, tơ gop hơ tŏk tơ iung tơ ring.

Kơ dră teh đak Nguyễn Xuân Phúc lăng ‘lơ̆ng dôm tơ mam đơ̆ng hơp tak xăh Sinh Dược

Lơ̆m noh kăl bơ ngơ̆t truh tơ gŭm găh jên, teh tơ hnă, pơ tho tơ drong jang, roi tơ ƀôh tơ mam tơ̆ anih tĕch mơ dro, mă loi ‘noh jĭ dôm tơ mam ‘lơ̆ng, đei anih tĕch mơ dro ‘mĕh vă nhen dôm hơp tak xăh Sinh Dược păng Bồ Bát. Kŭm hăm ‘noh tơ gŭm dôm hơp tak xăh hơ tŏk tơ iung dôm tơ mam kiơ̆ kơ jă kăp gĭt, tơ mơ̆t yua khoa hŏk kơ măy kơ mŏk vă pơm tơ mam ‘lơ̆ng, ưh khan lăp pơm lăp hăm dôm tơ mam ăn anih tĕch mơ dro vă jê̆ 100 triệu ‘nu kon pơ lei Việt Nam mă oei gơh tĕch tơ lĕch tơ̆ teh đak đe.

         Thuem: Tơ blơ̆