VOV4.Bahnar - ‘Năr 28/12, tơ̆ Đà Nẵng, Kơ dră tĕh đak Nguyễn Xuân Phúc truh pơ ma đam plt Đà Nẵng: Jơ nei păng hơ mĕng. Kiơ̆ nơ̆r tơ roi đơ̆ng plt, đơ̆ng jing plt găh Trung ương sơ năm 1997 truh dang ei, Đà Nẵng jing tơ ring dơ̆ng hơ drol găh mŭk drăm tơ̆ tơ ring Tŏk bŏk. Dôm tơ drong jơ nei đơ̆ng rŏng 25 sơ năm âu ki ‘nŏh jĭ hơ yak tŏk tôch pran, mŭk drăm tŏk ‘lơ̆ng hơ nơ̆ng.

Ƀât tam mă tơ ƀâp mơ mat tat yoa đơ̆ng jĭ hơ buh, sơ năm 2019, tơ drong jang mŭk drăm kơ Đà Nẵng iŏk đei vă jê̆ 69.500 ti hlak jên, iŏk yoa jô̆ păh lăp kiơ̆ kơ̆l bơ ngai hlŏh 97 triu hlak jên 1 sơ năm. Mă đơ̆ng tơ ƀâp mơ mat tat yoa đơ̆ng jĭ COVID-19, sơ năm ‘nâu, tơ drong jang mŭk drăm kơ plt pơ hlom đei vă jê̆ 64 rơ bâu ti. Plt kŭm đei lơ tơ drong tơ plih pran vă jang tŏk.

Pơ ma lơ̆m jơ pơ ma đam, Kơ dră tĕh đak tơ tă, Đà Nẵng ưh gơ̆h lăp đon kơ dih, mă athei akŏm jơ hngâm jang atŏk tơ iung khul bơ ngai jang vă pơ yoa ăn tơ drong jang tŏk. Đà Nẵng athei jang tŏk jing anih tĕch mơ dro tơm hăm apŭng plenh tĕh, anih truh ‘lơ̆ng hơ iă hăm bơ ngai tơ mât jên jang, bơ ngai chă tơ mang lăng; jing jơ hngâm pran, nhen kơ̆l gre vă dui hơ tŏk tơ drong jang mŭk drăm lơ̆m tĕh đak, jing um ai păng jơ hngâm hưch hanh găh tơ drong jang tŏk kơ dih, khŏm yak hlŏh mơ mat tat găn trong, jang tŏk pran ‘lơ̆ng kơ Việt Nam.

Dơ̆ng: Tơ blơ̆