VOV4.Bahnar - Kơ dră tĕh đak Nguyễn Xuân Phúc hlôi pơ ma nuh hăm Kơ dră Kuô̆k hô̆i păng Thủ tướng tĕh đak găh tơ drong tơ gŭm jang atŏk tơ iung kơ măy kơ mŏk ‘nao, lơ̆m nŏh đei unh hơ yuh rơ gŏh, pin păng drơ̆ng nơ̆r tơ roi ăn Kuô̆k hô̆i ‘măng mă âu 1,2 trong jang tơ gŭm kơ tĕh đak pơ ‘nhŏ ăn jang kơ măy kơ mŏk ‘nao. ‘Nâu jĭ nơ̆r tơ roi đei Kơ dră tĕh đak tơ lĕch kơ sơ̆ 12/12 tơ̆ Lêh tơ lĕch man Hnam kơ măy pơm Pin ô tô VinES tơ̆ tơ ring jang mŭk drăm Vũng Áng (dêh char Hà Tĩnh).

Pơ ma lơ̆m jơ pơm lêh, Kơ dră tĕh đak Nguyễn Xuân Phúc akhan, tơ drong jơ nei đơ̆ng Vingroup lơ̆m tơ drong dăr dĕh tơ plih jing grŭp jang kơ măy kơ mŏk, ưh lăp tơ iung jơ hngâm hưch hanh ăn dôm grŭp jang mŭk drăm nai kơ Việt Nam đĕch mă oei tơ gop gĭt kăl lơ̆m tơ drong pơ jing tơ mam “Make-in-Vietnam” rơ gŏh ‘lơ̆ng, păng iŏk yoa dơ̆ng pin unh hơ yuh rơ gŏh.

Kơ dră tĕh đak Nguyễn Xuân Phúc pơ ma hơ dăh, tơ drong nol vă jang tŏk đơ̆ng Việt Nam hrei ‘nâu athei iŏk kon bơ ngai, đon hlôh vao, păng khoa hŏk-kơ măy kơ mŏk ming ƀât anih tơm dơ nơm lơ̆m trong jang tŏk kơ jăp đunh. ‘Nâu jĭ chơ khoă vă tĕh đak bơ̆n tŏk hlôi kơ sô̆ iŏk yoa păh lăp, jang tŏk mŭk drăm tŏk truh tơ drong hơ nŭk hơ noa ăn tĕh đak, ăn hơ drĕch hơ drung. 

Dơ̆ng: Tơ blơ̆