VOV4.Bahnar - Sơng iŏk nơ̆r krao hơ vơn đơ̆ng Kơ dră tĕh đak Kenya, Kơ dră chĕp kơ̆l pơ lơh kơ Jơ nŭm vei lăng sơ đơ̆ng Liên hợp quốc khei 10/2021, gơ măng 28/10, Kơ dră tĕh đak Nguyễn Xuân Phúc vang akŏm păng iung pơ ma lơ̆m jơ hôp pơ ma nih tih pơ gơ̆r trư̆k tuyê̆n găh tơ drong jang hơ doi đơ̆ng Liên hợp quốc păng Jơ nŭm Châu Phi (AU) hăm hơ năn “Hơ tŏk tơ drong tơ guăt 1 ƀơ̆r đon yoa tơ drong rơ ngei păng sơ đơ̆ng lơ̆m 1 tơ ring đei tơ drong tơ blăh tŏk bŏk vă tơ plih ming”.

Tơ drong kơ dră tĕh đak Nguyễn Xuân Phúc vang truh hop akŏm tơ ƀôh hơ dăh hơ năp jang, tơ drong tơ gop ‘lơ̆ng đơ̆ng Việt Nam lơ̆m tơ drong jang hơ doi đơ̆ng Liên hợp quốc păng dôm khul grŭp lơ̆m tơ ring, atŭm hăm ‘nŏh hơ nơ̆ng tơ ƀôh tơ drong jơ nei iŏk đei lơ̆m khei Việt Nam pơm Kơ dră pơ lơ̆h kơ Jơ nŭm vei lăng sơ đơ̆ng Liên hợp quốc (khei 4/2021).

Tơ̆ jơ pơ ma nuh, Kơ dră tĕh đak tơ chĕng ‘lơ̆ng găh dôm tơ drong jơ nei, đon adrin păng tơ drong jang tŏk, mât hơ dai hăm apŭng plenh tĕh đơ̆ng Châu Phi khei ‘năr âu ki, atŭm hăm ‘nŏh tơ ƀôh đon mơ nat hăm dôm tơ drong mơ mat tat, pơ long nol so păng ‘nao mă Châu Phi dang ei oei tơ jră, mă loi jĭ dôm tơ drong kơ nê̆ đơ̆ng tơ blăh vang, ưh sơ đơ̆ng păng jĭ COVID-19.

Dơ̆ng: Tơ blơ̆